Clemens episcopus. seruus seruorum dei. dilectis filiis Preposito. Herboni et Kalhocho. Canonicis Ecclesie Ratisponensis.Salutem et apostolicam benedictionem. Transmissa nobis uenerabilis frater noster . . . episcopus frisingensis. patronus eccle siarum de Waidhouen. de Aspach et de Holenstein. Patauien. diocesis petitione monstrauit. quod cum felicis recordationis Urbanus papa. predecessor noster. causam. que inter ipsum ex parte una. et .... Abbatem et Conuentum Monasterii de Sitansteten. Ordinis Sancti Benedicti eiusdem diocesis ex altera parte super iure patronatus ecclesiarum ipsarum uertebatur. ab audientia Magistri Gerardi canonici Patauiensis auctoritate apostolica cognoscentis de ipsa per apellationem legittime ad Apostolicam sedem delatam .... Abbati Monasterii de Tirhuopt per suas litteras duxerit committendam. idem Abbas de Tirhoupt Magistro Marquardo Scolastico Augustensi commisit super housque ad diffinitiuam sententiam uices suas. Sed iidem Abbas et Conuentus de Sitansteten sufficienti conficto grauamine ab audientia dicti subdelegati ad sedem apostolicam appellarunt. quorum appellationem prefatus subdelegatus friuolam. prout erat. reputans finito appellationis articulo rite aliquamdiu processit in causa, et demum ad dictum. Abbatem de Tirhoupt remisit eandem. qui cognitis ipsius cause meritis et iuris ordine obseruato pro eodem episcopo diffinitiuam sententiam promulgauit. eosdem Abbatem et Conuentum in quadam summa pecunie ipsi episcopo. expensarum nomine condempnando. que sententia nulla legittima prouocatione in rem transiit iudicatam. Wernherus quoque perpetuus vicarius ecclesie in Welz. Salzburgensis diocesis. quem nominatus Abbas de Tirhoupt executorem uice sui constituerat. quod sententiam ipsam executioni debite demandandam in Rudolfum Abbatem dicti Monasterij de Sitansteten eidem diffinitiue parere contumaciter denegantem excommunicationis sententiam exigente iustitica promulgauit. quam ipse Rudolfus abbas dampnabiliter uilipendens diuina officia celebrare. imo quantum in eo est. uerius prophanare presumit in anime sue periculum. dicti episcopi preiudicium et ecclesiastice discipline contemptum. Quare fuit pro parte ipsius episcopi nobis humiliter supplicatum. ut easdem sententias curaremus apostolico munimine roborare. ac eundem Rudolphum Abbatem pro huiusmodi presumptionis excessu puniri poena canonica mandaremus. Quocirca discretioni uestre per apostolica scripta mandamus. quatenus sententias ipsas. Diffinitiuam sicut est iuste. per censuram ecclesiasticam. excommunicationis uero. sicut rationabiliter prolata. faciatis auctoritate nostra usque ad satisfactionem condignam. appellatione remota. obseruari. Super eo autem. quod predictus Rudolfus Abbas sic ligatus. diuina officia temere celebrare. quod canonicum fuerit. appellatione postposita. statuatis. facientes quod decreueritis. per censuram eandem firmiter obseruari. Quod si non omnes his exequendis potueritis interesse, duo uestrum ea nichilominus exequantur. Datum Perusii XVI. kalend. Maji Pontificatus nostri Anno Primo.

Source Fulltext: RAAB, Seitenstetten (=FRA II/33, Wien 1870) S. 76-77