Ich Ott der Stainaer tven chvnt allen den. di disen brief an sehent oder horent lesen, daz ich mit gvtem willen daz lehen datz Raevt bei dem pvechperch. daz ich ze rechtem lehen het von dem gotshavs datz Sytansteten. han avf gegeben meinem herren abt Chvnraten. dem erwaeren abt ze Sytansteten vnd demselben gotshovs. mit dem zehent. den in dar avf han, vmb ahzehen pfvnt pfenninge, waer aver iemen, der daz vor genant gotshovs an spraech vmb daz vor genant lehen, des sol ich vnd meiner chint des vor genanten gotshavs gewer sein, an aller stat. Dar vmb gib ich abt Chvnraten vnd seinem gotshovs meinen brief bestaeting mit meinem hangvnden insigel. Des sint gezivge. di da pei gewesen sint. Her Hainrich von den winden. Herman der Nevnberger, Leo vnd Alram der stiller, Ludweich der Amman von ybsitz, vnd ander fromer laevt genvch. Daz ist geschehen des Jars. do waren von vnsers herren gebvrte ergangen drevzehen hvndert jar da nah in dem Sehsten Jar. an sand Greorgin tach.

Source Fulltext: RAAB, Seitenstetten (=FRA II/33, Wien 1870) S. 139-140