Nos Gotfridus. dei gratia Episcopus ecclesie Frisingen. scire volumus vniuersos presencium inspectores. quod literas honorabilis viri. Decani domini Laureacen. vidimus et atrectauimus. non abolitas, non cancellatas, sed in omni parte integras. per omnia in hec uerba. Ego albertus Decanus laureacen. Notum facio vniuersis. presentes literas inspecturis, quod cum ex quadam composicione amicabili. facta super minutis decimis. inter venerabilem patrem. Dominum Ottonem Abbatem in Sytansteten ab vna, et discretum virum dom. Chunradum. Plebanum de Gestnich a parte altera. fides coram me fieri deberet. Vtrum Decime fabarum. pisarum. lini. papaueris et ceterorum similium secundum consuetudinem quatuor parrochialium ecclesiarum. videlicet amsteten. aspach. Neunhouen et alharsperg majoribus uel minoribus connumerentur decimis. sicut hec omnia in litera felicis recordacionis quondam domini Emichonis Frisingen. episcopi ex hoc confectis. plenius continentur. ego prefixo ad hoc ceteris loco et termino. et vocatis partibus, cum prefatus plebanus deesset, nec aliquis excusaret eundem, recepi a parte domini abbatis predicti productos pro testibus. quantum ad ecclesias aspach. Neunhouen et alhartsperg rectores earum, et cum quolibet eorum fide dignum virum parrochianum eorum. Quantum ad ecclesiam de Amsteten. tunc vacantem, duos fidedignos viros de plebe ipsa, per quorum deposiciones clare patuit. in illis parrochiis de consuetudine earum decimis connumerari maioribus decimas fabarum. pisarum. lini. papaueris. et generaliter omnium que per aratrum excoluntur. et de talibus percipi ab illis decimas, quibus maiores decime persolvuntur. et de hoc nichilominus multorum. tam clericorum quam laycorum. tunc ibidem presencium. erat publica vox et fama. Acta sunt hec apud Sytansteten Anno domini M°. CCC°. XII. in die s. Theodori martyris presentibus dominis Johanne de hag. Friderico de aspach. Alexandro de althartesperg ecclesiarum plebanis. Hertwico vicario ecclesie de Neunhouen. heinrico de horawe. et Ottone de wasen. militibus. Rugero de zaucha. alramo et otachero. fratribus. Marquardo de Luechsnich. Wolfkero de wasen. Hermanno gereverio. Sifrido hesib. Ditrico de gleuzze. Eklino de winden. Ditrico magistro zeche de waidhouen. et Ditrico dicto romer, et aliis pluribus fide dignis. In quorum omnium testimonium pendenti Sigillo meo presentes literas communiui. In cujus rei testimonium nostrum sigillum duximus presentibus apponendum. Datum in waidhouen. Anno domini M°. CCC°. Duodecimo. Sabbato post diem beati Nycolai.

Source Fulltext: RAAB, Seitenstetten (=FRA II/33, Wien 1870) S. 154-155