Reuerendo in Christo Patri et Domino, domino Mauritio. venerabili Abbati totique Conuentui Scotorum in Wienna. Otacherus dei gratia Abbas. ac totus Conuentus Ecclesie beate Marie in Seideinstetn. cum orationum suffragijs sinceram ad queuis beneplacita voluntatem. Defectum labentis temporis. ymmo hominis cum tempore. secundum quod dicit beatus Gregorius. quod cum labente labitur. qui labenti innititur. ex instabili statu seculi transeuntis. nobis conuenit intueri. ex eo scilicet. quod secundum Prophetam. Tempus est plus causa corrupcionis quam generacionis. propter quod juxta verbum apostoli. Quod antiquatur et senescit prope interitum est. Vnde vertis christiane fidei philosophus beatus Job, humane condicionis materiam et miseriam deplorat dicens. Homo natus de muliere, breui viuens tempore. multis miserijs adinpletur. Qui quasi flos egreditur et conteritur et fugit velud vmbra et nunquam statu permanet in eodem. In quibus verbis circa humanam miseriam. deploratur primo fragilis natura. quia homo est animal rationale et cum hoc mortale. Et vilis materia. quia natus de muliere. hoc est de mulieris menstruo sangwine. et velox transitus vite. Quia brevi viuens tempore. et multiplicitas miserie. quia repletur multis miserijs. et marcessibilis gloria. quia quasi flos egreditur et conteritur. et fallax subsistentia. quia fugit velud vmbra. et instabilis persistencia. quia nunquam in eodem statu permanet. propter quod vt in summa dicatur. homo concipitur in culpa. nascitur cum pena. viuit in labore. et moritur cum dolore et timore. quia vt dicit Salomon Nescit homo finem suum. et utrum amore vel odio dignus sit. Ideoque quidam Sapientes huius mundi videntes. contra predictam miseriam se non posse perfectum remedium per suam sapientiam inuenire. et prudenciores filijs lucis se in sua generatione. tam false quam friuole reputantes. aliquale solacium miserie fingere presumpserunt. in eo. quod si non possent viuere vt vellent. studerent tamen velle viuere sicut possent. Sub quo solatio miserie. vt dicit Boetius. miseris tamen semper remanet sensus doloris. qui a vere sapientibus non minima infelicitatis porcio iudicatur. Qua propter vera philosophia christiane fidei vt dicit ysodorus. est sola meditacio mortis que credit et docet vera solacia miserie in presenti. et perfecta remedia in futuro. que sunt antydota sacramentorum ecclesie contra miseriam culpe in presenti. et solacia suffragiorum et communicatio et participatio bonorum et meritoriorum operum contra penam gehenne perfectum remedium. absolucionis et remissionis culpe et pene pariter conferencia in futuro. Qua consideracione vestra diligens circumspeccio. pro vestra et confratrum vestrorum salute hominis utriusque tam feruenter quam salubriter intendendo. et prudencius attendendo. quod id. quod singulariter singulis non conceditur. diuine propiciacionis habundancia multiplicatis intercessoribus elargitur. nostre confraternitatis speciale consorcium et suffragiorum ac oracionum et bonorum operum, que in nostra Ecclesia et a nobis Domino dante fiunt pro viuis pariter et defunctis. curauit a nobis et nostro collegio suppliciter postulare. nos et nostros confratres in benediccionibus dulcedinis huiusmodi confraternitatis mutue preueniendo. quam nobis tam liberaliter quam libenter vestris litteris copiosius optulistis. et deuocius ac firmius confirmastis. Nos itaque huic gracie gratitudine ac vicissitudine debita occurrentes. eiusdem confraternitatis mutue plenum consorcium. vobis et vestro venerando Collegio offerentes transmittimus in hijs scriptis et inuiolabiliter conseruandum in perpetuum confirmamus. Cuius communicacionis suffragiorum et bonorum articuli taliter declarantur. diligencius obseruandi. videlicet quod statim. vt alicuius vestrorum confratrum obitus nobis cercius fuerit intimatus. priuato die proxime succedente. vigilias longiores cum novem leccionibus. et Missam defunctorum cum nota. ac compulsacione sollempni in ara publica facimus decantari. Insuper Quilibet de nostro Conuentu sacerdos tres Missas defunctorum continuat nisi festum interueniat. quod si fuerit. statim festo decurrente conplebit. Qui vero sacerdos non fuerit. litteras tamen sciens. tria legat Psalteria. et totidem vigilias longiores. Reliqui vero nescientes litteras vt barbati CCC Pater noster, ipsius defuncti ac omnium in confraternitate decedencium animabus in remedium. et salutare suffragium dicere tenebuntur. Sperantes in summi gratia redemptoris. vt hijs sacramentorum suffragijs. alijsque nostris pietatis operibus anime fratrum nostrorum. que ex hoc seculo feliciter transierunt. ad eterne beatitudinis consorcium in celesti patria perducantur. ceterum vt et fructuum vestrorum bonorum operum possimus esse participes. qui et pij laboris haberi volumus non expertes. Datum in nostro Monasterio Anno Domini M°. Trecentesimo vigesimo quarto In vigilia Ascensionis Domini.

Source Fulltext: RAAB, Seitenstetten (=FRA II/33, Wien 1870) S. 178-180