Ich Hainreich. Dietreichs von Glaevz saelig sun vnd all mein erben veriehen offenleich mit disem prief vnd tun chunt allen den. die in sehent oder horent lesen. Daz wir mit woluerdahtem mut vnd gutleichem willen, nach vnserer freunt rat. czder czeit, do wirz wol getun mohten. vnserm genaedigen herren hern Dietmaren, czden czeiten Abt cze Seidensteten vnd seinem gotshous cze chouffen haben geben, allez daz gut, daz wir haben gehabt cze sand Veit, ez sein hovser, aecker, wismad oder peovnt, swie ez genant ist, mit allen den nutzen, vnd rehten. die dar czu gehorent, cze holtz, czeuelt, besueht vnd vnbesueht. als wir die vnd vnser vordern in nutz vnd in gwer haben gehabt, vmb czwaie vnd sehtzich phunt phenning wiennaer mvnze, der wir gantz vnd gar verriht vnd gewert sein, also beschaiedenleich. daz wir noch vnser nachchomen furbaz dhain ansprach schullen haben auf daz selb gut. Dar vber czu ainem sihtigen vrchunde vnd czu einem waren getzeug diser sache geben wir vnserm vorgenanten herren Abt Dietmaren cze Seidensteten, vnd seinem gotshous disen offen prief. versigelten mit meinem egenanten. Hainreichs Dietreichs sun von Glaevz saelig anhangundem Insigel, vnd mit der erbaern mann. Chunrates des Schirmaer. czden czeiten rihter cze Seidensteten, vnd mit Ottens des Pauzzen anhangunden Insigeln. die durch vnserer besunderer pet willen czu einem getzeug diser sache ir insigel an dem prief habent gelegt. Daz ist geschehen vnd der brief geben cze Seidensteten an Sand Chvnigunden tag, do man von Christes gepurde czalt. Drevtzehen hundert iar. dar nach in dem ayn vnd viertzgisten iar.

Source Fulltext: RAAB, Seitenstetten (=FRA II/33, Wien 1870) S. 214-215