Reuerendo in Christo patri et domino sincere diligendo dom. Dietmaro venerabili Abbati, dom. Liebhardo Priori totique Conuentui Ecclesie in Seydenstetten, Patauien. dyoc. ordinis sci Benedicti. Vlricus dei gratia Abbas Hainricus Prior totusque Conuentus Ecclesie Admonten. Saltzburgen. dyoc. eiusdem ordinis, ad ipsorum mandata et beneplacita se deuotos. Quoniam karitatem fraternitatis inuicem diligere. precipit apostolus. atque monet, et precipue inter ejusdem religionis professores longius propagare et lacius ipsius propagines dilatare, quo leciores et laciores ipsius fructus proueniant salutares. Nos vestris deo acceptabilibus et nobis plurimum gratis precibus atque votis alacribus et festiuis desiderijs occurentes, vestris personis, nobis non immerito venerandis pariter et diligendis, plenum fraternitatis nostri Conuentus et monasterij consorcium et participacionem fraternam suffragiorum, oracionum, jeiuniorum, missarum aliorumque beneficiorum spiritualium, quibus deus placari consueuit hominibus, et eciam prebendarum et aliarum obuencionum, que occasione prebende solent nostris fratribus ministrari, quocienscumque cum literis sui Prelati vnum vel plures nos accedere contigerit, concedimus et tribuimus per presentes, voto et voluntate vnanimi et concordi, viuis pariter et defunctis. In cuius rei testimonium presentes literas sigillis nostris fecimus communiri. Actum et datum Admont, anno domini Millesimo Trecentesimo Quadragesimo tercio, in die sce. Chunigundis virginis.

Source Fulltext: RAAB, Seitenstetten (=FRA II/33, Wien 1870) S. 217-218