Ich Erasmus Schreiber purger da cze Steyr vnd ich Chunigund sein hausvrow, wir vergehen offenbar mit dem gegnwurtign brief vnd tun chunt allen den, di in ansehent, lesent oder hornt lesn, daz der ernwirdig geistleich herr Abbt Engelschalch vnd der gancz ersam Conuent da cze Seydnstetn, mit wolbedachtm mut vnd mit gemainen gutleichm willn ganczn czehent der guter, czwair lehn auf dem Schermperg, czwair lehn auf der Oed, czwair lehn an dem Pirchech, ains lehn an dem Puhel, ains lehn dacz dem Selmer, ains lehn in dem Czeilaech vnd ains lehn an dem Prunn in Pehemperiger pfarr gelegn mit alln nuczzn vnd rechtn, di durich recht dar czu gehornt, besuecht vnd vnbesuecht, bestifft vnd vnbestifft, wie di genant, sind, di sew vnd ir Gotshaus cze Seydnstetn dar auf von altter her pracht vnd gehabt habnt, vns czu vnser paider taegn recht vnd redleichn czu rechtem leibgeding habnt cze chauffn gegebn vnd ingeantwurt vm drey vnd fumfczik pfunt wienner pfenning, der wir sew gancz vnd gar gericht vnd gewert habn. In der beschaidn, wann wir paide abgen mit dem tod, so sulln di vorgenantn czehnt aller der guter, di obn geschribn stent, mit allen ern, rechtn vnd nuczzn, di dar czu gehörnt, cze hant nach vnser paider tod an aller vnser erbn, vrewnt vnd nachchomen oder wer irn brief, den sew vns dar vber habnt gegeben, inn hat irrung gancz vnd gar an all chrieg, in vnd iren offtgenantn Gotshaus cze Seydnsteten vrey vnd ledig sein also daz nyemant dhain ansprach nach vnsern taegen dar auf wider sew sol habn weder vil nach wenikch. Daz in daz allez stet vnd vnuerchert beleib. Dar- vber czu ainem sichtign vrchund geb wir in den offenn brief, wann ich egenanter Erasmus aygens jnsigil nicht hab, wol versigiltn mit der erbern vnd wolbeschaidn Jansen des Tungazzinger cze der czeit Richter cze Steyr vnd hainreichs des Volber purger cze Steyr anhangundn insigilln, di||
da mit der vorgeschribn handlung sind durch vnsers vleizzign pets willn geczeugn wardn in vnd alln irn erbn an schadn. Der brief ist gegebn nach Christi gepurd vber dreyczehn hundert jar, dar nach in dem subnczgistn jar. an sand Elyspetn Tag.

Source Fulltext: RAAB, Seitenstetten (=FRA II/33, Wien 1870) S. 256-257