Ich Hertel der Wasner von Chrellndorff, mein hausfraw, vnser paider erbn, lemptig vnd chumftig, wir vergehn vnd bechenen offenleich an dem prief vor allen lewtn, wo der fur chumpt, gelesn vnd gehoert wirt, daz wir nach rat gunst vnd willen vnser nachstn vnd pestn frewnt, czun der zeit, da wir ez mit recht wol getun machtn, recht vnd redleich verchawft vnd ze chauffn habn gebn all vnserew recht vnd manschaft, di wir gehabt habn ze leichn auf drin zehent haewssern, die her nach beschribn stent, von erst auf zwain lehn in dem herfurt gelegn in wolfspekker pharr, da di zeit auf gesessn sint Hainreich vnd Thoman, vnd auf ainer hueb die reichnhueb, die gelegn ist pei der trefnik in seitensteter pharr, da die zeit dietreich auf gesessn ist, von den zehethaewssern man vns allew jar iaerleich gedient vnd geraicht hat ein chalpp ze ostern, daz wol zwaier vnd dreisik wiener phening wert ist, die selbn manschaft, dienst vnd rechtn habn wir ze lehn gehabt von dem ersamen gotzhaws ze Seitnstetn vnd die selbn dienst, ern vnd rechtn, die wir von den egenanten ze lehen gehabt habn vnd als wirs vnd vnser vadern in nucz vnd in gewer her pracht habn, in rittermässiger lehnschaft, in sulcher mazz habn wirs gebn dem weisn vnd beschaidn mann Thoman dem pawngartner, purger ze Aspach, seiner hausvrawn, ir paidn erbn, lemptign vnd chunftign, vmb ein sum eins gelts, des wir von in gericht vnd bezalt wardn sein gancz vnd gar ze rechtn taegn an all schaden, vnd habn sew der selbn manschaft vnd auch des diensts gewaltig gemacht, vnd an nucz vnd an gewer geseczt mit herrnhant, als wir in verlubt vnd gehaisn habn. Sew schulln vnd mugn auch hinfur alle irn frumen da mit schaffn, mit verleichn, verseczn, verchauffn, schaffn, machn vnd gebn wem sew welln, an all vnser irrung vnd hindernuzz, wir sein auch des selbn chaufs vnd manschaft für vns vnd vnser erbn vnd all vnser frewntschaft ir recht gewer, scherm vnd furstand an ieder stat, wo in des not ist mit dem rechtn, als solich chauff vnd manschaft recht habnt in dem lant ze Oesterreich. Waz in daran ab ging mit dem rechtn, des sew schaedn naemen, daz schulln sew habn dacz vns alln vnuerschaidenleich vnd all vnserm gut, wo wir daz habn oder noch gewinen, wir sein lemptig oder tod vnd ir schaedn vollikleich da von bechomen, an furbot an chlag vnd an als recht, mit vnser aller gutleichn willn vnd gunst. Daz in daz von vns alln hin fur also staet vnd vnzebrochn beleib, dar vber gib ich obgenanter wasner, mein hausvraw, vnser erbn vnd all vnser frewntschafft dem egenanten pawngartner, seiner hausvrawn vnd irn paidn erbn den gegenwurtigen prieff cze ainer warn vrkunt der sach vnd der warhait, besigillt mit mein selbs anhangundn insigell. der sach ist auch zewg durch vnser fleizziger pet willn mit seim anhangunden insigell zachreis der Scharner, im vnd seinen erbn an schaedn. der prieff ist geben nach Christi gepurd vber drewzehn hundert jar dar nach im vier vnd newnczistn jar, an sand barbara tag.

Source Fulltext: RAAB, Seitenstetten (=FRA II/33, Wien 1870) S. 354-355