Fridericus dei gratia dux Austrie et Stirie et dominus Carniole omnibus hoc scriptum inspecturis in perpetuum. Preceptis salutaribus moniti de bonis a deo nobis collatis ipsius seruitoribus libenter porrigimus subsidia caritatis, ut non solum exinde christi gloria augmentum recipiat, verum etiam ad bonorum operum studia provocando, uota cunctorum efficaces comprobemur domus domini zelatores. Sciant itaque preteriti et presentes, quod nos affectu, quo deo jugiter famulantes gratioso semper animo amplexamur sincero et solito, invitati villam nostram Ekkendorf iuxta Wachrein et duas curias in Paeschingen et in Ceilae abbati et conventui in Wilhering liberaliter contulimus in perpetuo possidendas, statuentes districtius et mandantes, ut nullus nostrorum iudicum vel aliorum officialium sev preconum quicquam iuris sibi de cetero nostro aut alieno nomine vendicare debeat in eisdem, hoc dumtaxat excepto, quod si fur uel alius facinorosus pro maleficio in ipsis fuerit deprehensus, sine omni emolimento succinctus tantum cingulo nostro iudici vel aliorum, in quorum ditione maleficia perpetrentur, debeat presentari, vt justum fuerit puniendus. Id ipsum in omnibus suis possessionibus volumus observari. Et ut uirtutis stimulo in donis nostris crescere videamur, eidem insuper abbati et conuentui talentum salis maioris ligaminis sev ponderis super id, quod fratrum et familie eiusdem monasterii necessitati sufficit, annuatim transducendi semel in anno sine mutta liberam concessimus facultatem. Vt autem huiusmodi liberalitatis nostre donatio perpetui roboris optineat firmitatem, presentem paginam sigilli nostri munimine roboratam ipsis super hoc duximus concedendam coram testibus subnotatis: venerabilibus Rudegero Pataviensi, Chunrado Frisingensi, Heinrico Seckowensi episcopis, Liutprando tumpreposito Pataviensi, magistro Vlrico de Chirchperch preposito sancti Jacobi in Babenberch, et nobilibus viris Chunrado comite de Hardecke, ministerialibus Heinrico de Prunne, Heinrico de Seveld, Ortliebo de Winckele, Vlrico et Pilgrino de Chappelle et aliis quam pluribus, quorum non sunt nomina hic notata. sunt hec anno domini M. CC. XLI. XIIII. Indictione. Datum in Chremse VII. kalendas octobris per manus dicti magistri Vlrici prepositi superius memorati tunc prothonotarii nostri, cui hec scriptura et sigillo nostris iniunximus consignanda.

Source Fulltext: OÖUB 3 (Wien 1862) S. 104-105, Nr. 99