Quum humana condicio semper mobilis uidetur ad instabilitatem, ideo facta in perpetuum duratura, ne aut obliuione pereant aut uitio instabilitatis hominum retractari valeant, perpetuis necessario debent confirmationibus conmuniri. Innotescat igitur tam presentibus quam futuris, quod ego Espinus dictus de Wolfstein cum pleno consensu domine Gertrvdis vxoris mee et amicorum nostrorum, videlicet domini Wolflini de dicto castro et aliorum, cum bona etiam voluntate Gneussonum, Wernhardi videlicet et Heinrici et aliorum heredum omnium eiusdem stirpis concambium feci cum ecclesia sancte Marie virginis in Wilhering et fratribus deo ibidem famulantibus, dando eis possessionem meam empticiam dictam an der leiten sitam iuxta Sibotonem quondam prouincialem iudicem dictum forstarium pro quodam predio sito in Marhorn iuxta dictum castellum in Wolfstein tali conditione nichilominus mediante videlicet, ut, si aliquis heredum meorum uel parentum prefate vxoris mee conmutationem antedictam infirmare seu contradicere presumpserit, asserens forte, supradictam possessionem hereditario iure ipsum contingere, memorati fratres de Wilhering sepedictum predium in Marhorn tam diu possideant, quousque talis calumpnia per me meisque sumptibus totaliter fuerit conplanata. Ad ampliorem autem huius conmutationis mee certitudinem et confirmationem presentes litteras super eo conscriptas sigillis dominorum meorum Wernhardi videlicet et Heinrici Nobilium de Schovnberch, cum proprium sigillum non haberem, munimine roboratas dictis fratribus assignaui. Huius autem rei testes sunt dominus Wolfelinus de wolfstein, Ludwicus Schiuer, Ludwicus et Vlricus fratres dicti de Ludwegstorf, Wernhardus Walch, Hermannus Gneusso et hii de mililitibus (sic), Herbordus de Perndorf, Chunradus dictus Aevschaer, Wernhardus et Heinricus fratres dicti Gneussen, Marquardus de Grůbe, Wulfingus officialis de Wessenberch et alii quam plures. Acta sunt hec Anno domini M. CC. LXXXII.

Source Fulltext: OÖUB 3 (Wien 1862) S. 555-556, Nr. 606