Cum more fluentis aque a fugaci hominum memoria transire soleant quelibet acta, decreuit veterum auctoritas facta perpetuo duratura voce testium et scripture testimonio roborari. Ea propter nos Wichardus, Philippus, Heinricus et Albero fratres de Pollhaim Notum fieri cupimus vniuersis tenorem presentium inspecturis, quod mediam partem curie nostre in Talhaim, que per equalem distributionem siue diuisionem prediorum nostrorum inter nos factam predicto fratri nostro Heinrico pro sua portione cesserat, dedimus et contulimus per manus nostras et sororis nostre Dimudis ecclesie sancte Marie virginis in Wilhering et fratribus ibidem deo famulantibus precipue pro remedio anime patris nostri ibidem sepulti et etiam pro aliquali summa pecunie titulo proprietatis possidendam perpetuo sine briga. Ne igitur dicta ecclesia uel fratres religiosi per istius modi emptionis actionem siue donationem ab amicis et coheredibus nostris aliquam scrupulose inpulsionis et querimoniarum super dicta curia de cetero patiatur calumniam, conuocatis nobis omnibus aput ecclesiam minorum fratrum in Welsa debitam et voluntariam abdicationem sev abstipulationem, que wlgo dicitur fürtzicht, fecimus singuli coram abbate dicti monasterii et aliis testibus fide dignis promittentes et obligantes nos nichilominus ad certam et iustam defensionem super eadem curia et etiam exhibere nos auctores, quod vulgo dicitur Gwer, cum requisiti fuerimus, absque dampno ecclesie antedicte in conmuni placito seu priuato. Quod si ipsam sepefatam ecclesiam circa promissiones premissas in aliquo neglexerimus, quidquid ex eo dampni receperit, tenemur per alia bona nostra eidem ecclesie restituere integraliter et delere. In cuius rei testimonium presentes litteras dicto monasterio et fratribus ibidem dedimus sigillo fratris nostri senioris domini Wichhardi, quia in presenti tempore plura sigilla non habuimus, munimine roboratas. Sunt autem testes dominus Wichhardus filius patrui nostri, dominus Rvgerus de vtersteten, dominus Rvgerus Prueschinch, dominus Gotfridus et Vlricus fratres de Pernowe, dominus Otakerus de Chirchperch, Rvdolfus et Heinricus de Berge, Ortolfus et Rudolfus de Alharting et alii quam plures. Datum anno domini M°.CC°.LXXX. tertio.

Source Fulltext: OÖUB 4 (Wien 1867) S. 15-16, Nr. 17