Albertus dei gratia Dux Austrie et Styrie, Dominus Carniole, Marchie ac Portus naonis vniuersis, ad quos presens scriptum peruenerit, Imperpetuum. Ad vtriusque vite felicitatem prodesse nobis nequaquam ambigimus, si loca diuino cultui mancipata curauerimus in suis confouere iuribus et eorum commodo pia intendere voluntate. Ea propter viris religiosis Abbati et Conuentui Monasterii in Wilhering Cysterciensis Ordinis, qui iurium et libertatum suarum quas a serenissimo domino et Genitore nostro domino Rudolfo romanorum rege semper augusto nec non ab Illustribus quondam Liupoldo et Friderico Ducibus Austrie nostris antecessoribus sunt ex gratia assecuti, nobis jnstrumenta et priuilegia presentarunt, petentes humiliter et deuote, quatenus ipsis libertates huiusmodi, jura et gratias dignaremur de nostra benignitatis affluentia innouare; ad instar ipsorum predecessorum nostrorum assensu exauditionis votiue duximus annuendum Recipientes dictos fratres cum bonis suis, quos et que preter nos habere nullum volumus, ut consuetum est hactenus, aduocatum in nostre defensionis presidium et fauoris gratiam specialem, Mandantes districtius, ne vllus eosdem grauet per exactiones indebitas in hominibus siue rebus. Item ipsius Monasterii homines a Generalibus placitis seu priuatis exemptos esse censemus et volumus, nisi illis adea venire placeat propria et libera voluntate. Vnde nullus Judicum nostrorum seu aliorum officialium uel preconum quicquam sibi iuris de cetero nostro aut alieno nomine uendicare presumat in prediis, possessionibus et in hominibus vniuersis Monasterii memorati, hoc duntaxat excepto, quod si fur vel alius Malefactor, qui pro maleficio in eisdem possessionibus fuerit deprehensus sine omni emolimento, succinctus tantum cingulo, nostro judici uel illorum, in quorum iurisdictionibus maleficia perpetrantur, presentari debet, ut iustum fuerit puniendus. Preterea libertates fratribus prelibatis obseruatas hactenus et indultas consueto fauore et beniuolentia prosequentes statuimus, quod victulia sua vel alieres proprie ipsorum vsibus pertinentes tam in terris quam in aquis sursum et deorsum libre transeant sine omni exactione thelonei siue Mute. Licet etiam et licebit dictis fratribus vnum talentum salis maioris ligaminis seu ponderis super id, quod fratrum et familie ipsius Monasterii necessitati sufficit annuatim, semel in anno ducere Mute debitum non daturis. Vt autem hec omnia inconcussa permaneant et perpetue robur obtineant firmitatis, districtione firmissima inhibemus, ne quis hanc nostre innouationis paginam et continentia in eadem infringere vel turbare attemptet, sicut indignationem nostram grauissimam voluerint (sic) euitare, Dantes in cautelam et testimonium euidens huius rei presentes litteras sigilli nostri consignatas karactere et patrocinio communitas. Datum Wienne Anno Domini M°.CC°. octogesimo quinto, III. Idus Martii.

Source Fulltext: OÖUB 4 (Wien 1867) S. 31-32, Nr. 35