Nos Albertus dei gratia dux Austrie et Stirie, dominus Carniole, Marchie ac portus Naonis declaramus presentium inspectoribus vniuersis, quod veniens ad nostram presentiam vir religiosus Abbas monasterii sancte Marie in Wilhering Cisterciensis ordinis quoddam nobis exhibuit priuilegium sibi et Conuentui suo ab illustri quondam principe Friderico duce Austrie antecessore nostro concessum et traditum, petens humiliter, vt ipsum priuilegium jnnouare, ratificare et confirmare de nostra gratia dignaremur. Cuius quidem priuilegii tenor per omnia talis est: (Siehe die Urkunde vom 25. September 1241.) Nos itaque cum dictum monasterium et Conuentum suum specialis beniuolentie prosequamur affectu, ipsorum Abbatis et Conuentus supplicationibus delectabiliter inclinati prenotatum priuilegium approbamus, innouamus et scripti presentis patrocinio confirmamus rata et grata habituri perpetuo vniuersa et singula, que in ipso priuilegio continentur. In cuius rei testimonium presentes sigillo nostro duximus roborandas. Datum Wienne vndecimo kalendas Martii Anno domini Millesimo ducentesimo nonagesimo primo.

Source Fulltext: OÖUB 4 (Wien 1867) S. 146, Nr. 156