Wir Vlrich vnd Levtold bruder von Mitterberch tun chunt allen den, (di) disen brif sehent vnd horent lesen, di nv sint vnd noch chunftich werdent, daz wir vnd vnser Hovsvrowen Christen vnd Christein vnd mein Vlrichs von Mitterberch chint Chvnrat, Vlrich, Durich, Marquart, Alhait, Wilbirch, Elspet, Offmei mit verdahtem mut vnd mit gutlichem willen nah vnser vrevnt rat vnd mit ir gantzer gunst haben ze chauffen geben dem erbern abt Chvnraten von Wilhering und siner Sampnung vnser vreis aigen den hof datz Hvncenpach, der vns von vnsern vodern an erbet, vnd haben den vorgenanten hof datz Hvncenpach wir vnd vnser Hovsvrowen vnd vnser chint, als vor benant sint, mit alle dev vnd dar zv geho^ert, ez sei an acher, an wisen, an holtz vnd swi ez genant ist, gestift vnd vngestiff, versuht vnd vnuersuht dem vorgenanten abt von Wilhering vnd siner Sampnung redlich vnd gentzlich aufgeben mit rehter furciht vnser vnd vnser Hovsvrowen vnd vnser chind also, daz den vorgenanten hof datz Hvncenpach mit alle, vnd dar zv gehort, swi ez benant ist, daz vorgnant Chloster vnd di Sampnung ze Wilhering in rehter aigens gwer, als wirs von vnsern vodern gehabt haben, ledichlich besitzen vnd haben suln vurbaz an allen chrig vnd mugen in auch wol geben ledichlich, swem si wellent, vnd suln wir vnd vnser Hovsvrowen vnd vnser chint, als vorgenant sint vnd di wir noh gewinnen, des vorgenanten hofs vnd alles dez dar zv gehort, des Chlosters vnd der Sampuung ze Wilhering gewer sin vu^er alle vnser erben vnd gein allen all, di sev vmb den vorgenanten hof ansprehten, swa vnd swanne si des bedurfen, nah lants reht an alle ir chost. Daz dieser chauf vnd disev bestetigung stet vnd vnuerchert ewichlich belib an allen chrig, des geb wir dem vorgenanten Chloster vnd der Sampnung ze Wilhering disen brif versigelt mit vnserm insigel vnd mit vnser vrevnt insigel Hern Hertnitz vnd hern Rvdels von Liehtenwinchel vnd hern Hertwichs von Strahen vnd bestetigt mit den zevgen, di hi benant sint, daz ist her Hertnid vnd Rvdolf von Lihtenwinchel, her Hertwich Strahener, her Hertneid der Druhsetz, Seybot sein bruder, Ortolf von Alharting vnd ander piderb Levt genuch, den diser chauf chvnt ist. Ditz ist geschehen, do von Christes geburd waren Tausent jar, zwai hvndert jar, in dem vir vnd Nevntzichsten jar an sant Mathees tag.

Source Fulltext: OÖUB 4 (Wien 1867) S. 212-213, Nr. 232