Ich Gedrut von lowenstain hern Ruegers wytib des pruschinchen vergich vnd tun chund allen den, di disen prief sehent oder horent lesen, Daz ich vnd mein wirt Peter von lowenstain vns ... verricht vnd ge ... haben nach vnser baider vreund Rat mit meinen chinden, di ich ... pei meinem erarn wirt hern Rugern dem bruschinchen, dem Got gnad, mit so beschaidner Red, daz ich mich vnd mein wirt peter verzigen haben allez des, des mein chind hawent, iz sei an Aigen, Lechen oder purchrecht, vnd meiner morgengab, di ich von hern Rugern meinem erarn wirt gehabt han, vnd anders gůtes, swie iz genant sei, daz ich noch mein wirt do mit nicht ze schaffen schaffen (sic) schullen haben mit worten noch mit werchen. Dorvmbe hawent mir meinev chind gegewen zwaihundert pfunt pfenning wienner Mvniz vnd habent mir do fur gesaczt zwainczichk pfunt geltes vnd sol di nemen noch hern Hainreichs Rat von volchenstorf vnd noch des hutter Rat nach irn trewen, di mir fuegen ze nemen vnd meinen chinden ze seczen; Swan meinev chind mir vnd meinen wirt gewent zwaihundert pfunt pfenning, so sol in di zwainczikch pfunt gult ledikch sein an alle arig liste, vnd daz die Red stet vnd gancz belib, dor vber gib ich vnd mein wirt disen brif ze einem ewigen gezeug versigelt mit vnsern jnsigel. Der brif ist geben, do ... geburd worn ergangen Dreuczehen hundert jar, dornoch in dem ... en jar des Nachsten suntages .....

Source Fulltext: OÖUB 4 (Wien 1867) S. 359-360, Nr. 386