Ich Otacher der Piber von Piberstain vergih vnd tu^en chunt allen den, di disen brief sehent und horent lesen, di nv sint vnd noh chvnftich werdent, Daz ich mit gutem willen vnd verhengnvzze meiner Hovsvrowen vron Chvnegunten vnd meiner chinde, als hi benant sint, Rugers, Hainrichs, vlrichs, Sigharts, Friderichs, Offmeyn, Gedruten, Elspeten, Margareten, Jevten han ze widerwehsel gegeben mit rehter furciht mein aigen datz aich pi sant mertein meinen gesweinn Ludwigen vnd vlrichen von Ludwichstorf vrilichen vnd ledichlichen an allen chrig vnd haben daz selb aigen in dem selben reht geantwurt vnd geben vnser vrowen ze wilhering ab irs bruder sel chunrats von Ludwichstorf meins gesweins also mit beschaidner red, daz ich des vorgenanten gu^etz mit allev dev vnd dar zv° (geho^ert, ich vnd mein) Hovsvrowe vnd meinev chint, als vor benant sint, die ich nu han vnd furbaz gewinne, des chlosters ze wilhering gewer sein gen allen den, di sev dar vmb ansprechent sint, wo vnd wenne si des bedurfen, an aller stat. Daz daz stet vnd vnuerchert beleibe, des geb ich dem vorgenanten Chloster ze wilhering disen brief versigelt mit meinem jnsigel vnd veruessent mit den zevgen, di hi geschriben stent. Daz ist Her vlrich vom Stain, Her Hainrich der Strachner, Herr Espein von (hag). Her Sighart von Gru^eb, Her wilhalm von Davhing, vlrich der Strachner, Friderich von Tobransperg, Levpold von ydumsperg, Salman der Ludwichstorfer, Pilgreim der walich, vlrich der (Stainenperger), Hertnid von (wolfs)fu^ert vnd ander pidber levt gnvch. Ditz ist geschehen, do von Christes gebu^erd waren Tausent jar, Drevhundert jar, in dem fv^enften jar des nehsten tags nah sant Bartholomes tag.

Source Fulltext: OÖUB 4 (Wien 1867) S. 491-492, Nr. 526