Wir Abt Chvnrat von wilhering offen vnd tvn chv^ent allen den, di disen brif sehent vnd ho^erent lesen, daz wir vlrichen dem Prenn haben lazzen vnd gelihen vnser aigen ze Ternpach, do ê werntzel von Talhaim auff waz, nach lantz gewonhait ze lantzsidelreht also mit beschaidner rede, daz der selbe vlrich prenn vns dinen sol daz vorgenant gůt ze Ternpach mit alle dev, vnd dar zv geho^ert, vnser gesatzt dienst vnd voderůng, als mans emalen hat gedinet vnd geben an allen chrig vnd an alle wider red also, daz auff dem selben aigen ihtz benv^ennen werde weder mit schenchen noch mit dhainer slaht, di von iemant schad oder vngemach mv^eg von begegen vnd auch, daz er ihtz ich auf dem vorgenantem gůt dann lantzsidelrehtz di weil, vnd er daz verdinen mach vnd von vnsern gnaden gehaben mach, wer aber daz, daz der vorgenant vlrich prenn so notich wůrde, des got niht geb, daz er dem êgenantem gůt niht getv°n mo^eht, dazz pv^eleich lege vnd vnser voderůng niht gewis weren, so sol vns vlrich prenn daz selbe gůt ze Ternpach wider antw°rten vnd aufgeben in vnser hant ledichlichn an alle wider red vnd mags anders niemant verchauffen, gesetzen, geben noch verchv°mbern mit disen sachen oder mit enen dann od vns, als betaidingt ist emalen vnd verriht vor pidern Levten. wer aber daz, daz vlrich prenn sich indert vergaezz oder vergezzen wolte an den sachen, als vorbenant sint vnd verschriben, oder daz vorgenant aigen ze Ternpach niht also laeg ze haus vnt ze velde vnd an andern sachen, daz wir sein er hieten vnd er selb gefv^er, daz sv^elen vns pezzern vnd pu^ezzen Pilgreim vnd wernhard Prenn, Hainrich der Hubner von Rudolfing, Hainrich snitchneht, wernhard vnd Ott von Chetzing vnd Hertel von Mu^elbach, di des Pu^ergel sint warn vnd vns darvmb gelo^ebt habent fu^er alle sache, der wir sorge haben vnd vns chv^enftich mo^eht weren an dem vorgenantem gůt. Daz diser gewerft vnd disiv taidinch stet ebichlichn beleiben, des hab wir haizzen schriben diesen brif ze einem v^erchv^ende versigelt mit vnserm Insigel vnd mit hern Hainrichs jnsigel von alharting, der vns der vorgenanten sache zvlegt an allen ding, ob sin not wu^erd, als betaidingt ist. da warn pi wernhart vnd Ott von Chetzing, Hainrich snitchneht, vlrich von Talheim, Meinhart von winchel, Pilgreim vnd wernhart Prenn vnd ander piderlevt genv^ech. Daz ist geschehn, do von Christes gebvrd warn Tausent jar, dreuhundert jar, in dem sibenten jar des nehsten ertags nah dem Sv^enbentag.

Source Fulltext: OÖUB 4 (Wien 1867) S. 528-529, Nr. 569