Ich Levtolt der Prv^eschinch mit sampt meinen bru^edern Vlrichen vnd Friderichen veriehen vnd tv^en chvnt allen den, di disen brief sehent oder ho^ernt lesen, daz wir mit vnser vrevnt rat Hern Hertneides von dem Strahen, Wernhartz von Mezzenbach vnd nach ander vnser erben weeisung haben verwandelt ze pezzeruug daz geschaeft, daz vnser vater Her Rv^eger Prvschinch schv°f ob seiner sel vnser vrowen ze Wilhering ze selgeraet also, daz wir an den sechzich mv°tten chorns vnd habern vnd an den sechs vnd dreizich phvnt phenning an ein Halbs, dafv^er daz selbe Gotzhaus vnser aigen hat inne gehabt, alss hie benant staet, daz ist zagelberch, Hozenbrv°nn, datz Inn, imm wert zwai gv°lt, daz Hous ze Euerding vnd daz aigen ze Prv^esching haben widerlegt vnd ledichleichen gegeben den erben (sic) Herren abpt Stephan vnd seiner Sampmv°ng (sic) ze wilhering fv^er Naevnzich phvnt phenning winner mv°nz, der wir in noch schvldich beliben mit rechter raittung, vnser vorgenants aigen ze Hozenbrv°nn, zagelberch vnd vnser Hous datz Euerding, daz fv^er vierdhalb phvnt gvlt geraitt ist, der sev ein halb phunt gelts ê angeho^ert, mit alle dev vnd dar zv^e gehort besv°cht vnd vnbesv°cht, swi ez genant ist, mit rechter fv^erzicht in aigens gwer ebichleichen ze haben an allen chrieg also beschaidenlichen, ob iemant vnder vns bru^edern daz selb v°rwar well gern wider haben, der geb der (sic) egenanten Herren Naevnzich phvnt phenning vnd hab sich zv° dem selben aigen, alss v il drev phvnt gelts gebegen (sic) mv^eg, also avz genvmenchleich, daz man von dem selben gv^ett von den sechs phvnt gelts ze Oberndorf, daz von Levtoltz tode vnd von Hern Vlrichen vnsern vetern vnd auch von vnserm vater daz Gotshaus angeviel vnd von sibenzich phvnt phenning di besunderlichen von vnserm vater vnd auch von mir fvr vier phunt gelts den selben Herren ze selgeraet geschaft sint, daz alss ze samm fv^er drevzehen phvnt gult gerait ist, geb einem iglichen Herren da selb in der vasten all tag ein Housenstukh, als verre di gult geraichen vnd getragen mv^eg, vnd auch dar zv^e di vier wochen vor weinachten daz man ie dem mann ein mazz weins vnsers vogelgraben oder eins als gv^eten, den man denne gehaben mach, nach der altherren rat zv der taeglichen mazz geb ze trost vnd ze hail vnser sel vnd vnsern vordern sel also, daz in ir phrv^ent an hering, an vischen vnd andern sachen, dis ê gehabt habent, swi di gehaizzen ist, dar vmb icht abgezogen werd. Wer aver daz, das des nicht geschech vnd mit willen an recht êhaft not den selben Herren abgenvmen wurd, so svln wir uns des naehsten dinstes an wein vnd an traid vnd an anderm nu^etz, der dar nach chomt, vnderwinden vnd den geben auf ein Gotzhousen, wa wir wellen, vntz ez gepezzert werd. Daz ditz geschaeft staet ebichleich beleib, so gib ich den vorgenanten Herren ze Wilhering disen brief ze einem v°rchvnd versigelten mit meinem jnsigel, wan mein bruder dehaeins habent, mit Hern Hertneids jnsigel von dem Strahen vnd mit vnsers Ohaims jnsigel Wernhartz von Mezzenbach vnd bestaetigt mi\et den zevgen, di hie geschriben sint, daz ist Her Vlrich der pharrer von Euerding, Her wolfker der pharrer von Veldchirchen, Rvger der Staufenberger, Sighart, Wolfhart, Tiem vnser diener vnd ander levt genv°ch. Daz ist geschehen, do von Christes geburd waren Tovsent jar. Drevhvndert jar, in dem drevzehenten jar des naehsten svntages vor sand Katherein tach.

Source Fulltext: OÖUB 5 (Wien 1868) S. 117-119, Nr. 117