ICh wernhart der Pirchinger vergich vnd tvn chvnt allen den, di disen brief sehent oder ho^ernt lesen, daz ich mit verdachtem mu^et vnd mit gu^etem willen meins bruders Sighartz vnd Petersn, Elsbeten, Hedwigen vnd Hailwigen meiner swester vnd mit gu^eter gv^enst vnd rat aller meiner erben vnd meiner vrevnt den halben Hof ze Pyberowe, der mich vnd meinem vater, dem got genade, angeuallen ist vnd mit raehter tailvng von meinem bruder vnd von meinen swestern, als si vorgenant sint, mit rechter fv^erzicht an mich aeinen chomen ist vnd den ich auch von den erbern Herren vnd von dem Gotzhaus ze wilhering ze rechtem Lehen han gehabt, han ledichleichn aufgeben vnd ingeantwu^ert vnser vrown vnd dem Gotzhaus ze Wilhering durch meiner sael vud aller meiner vrevnt sael willen, si sein lebentig oder tode, also redlichn, daz di Herren ze wilhering den selben Halben Hof vnd allev dev, vnd dar zv^e gehort, swi ez genant ist, ze holtz vnd ze velde, ez sel versůcht oder vnuersv°cht, svln haben in nůtz vnd in gwer ebichleichn an allen chrieg, Vud daz dis red vnd dis gab also staet beleibe, so gib ich den erbern Herren abpt Hainrichn vnd der Sampnvng ze wilhering ze einem v°rchvnde disen brief versigelten mit meins Herren Hern Hainrichs des eltern von Schovnberch Insigl vnd mit meins Herren Hern Hainrichs von walse Insigel, wan ich selbe aigens Insigels nicht enhan. Des sint zevge Her Ludweich pharrer ze Greymarsteten, Her wernhart von Rotenuels, Her Sighart von Grv°be, Her Herman von Hvmroechtzried, Ottacher der fv°rter, Hertneid der wolfsfv°rter, Friedrich der volchrat, Herman, Symon vnd Ottacher sein brůder, wernher von Reisech, Ortolf von walting vnd ander piderb levt gnv°ch. Daz ist geschehen, do von Christes gebůrd waren Drevzebenhvndert jar, dar nach in dem sibentzehenten jar an dem Ochtaeten tach nach dem Paercht tach.

Source Fulltext: OÖUB 5 (Wien 1868) S. 180-181, Nr. 182