Ich charl ab dem Stain hern wernhers svn von sand veit vergich vnd tu^en chu^ent allen den, di disen brief sehent oder hornt lesen, das ich mit verdachtem muet vnd mit guetem willen meiner Hansfrawn frawn leukarten vnd vlrichs vnd katreij meiner chind vnd nach rat aller meiner frewnt Han den erbern Herren Abpt Hainrichen vnd seiner Sampnung ze wilhering ausgewesselt mein gu^et, das da haisset an der leyten vnd gelegen ist pei sand Georgen, vmb ir gu^et ains, das da gelegen ist pei mir auf dem stain pei lichtenberg, also mit beschaidner red, das der vorgenant abpt vnd di Sampnung ze wilhering das vorgenant guet an der leyten mit allew dew, vnd dar zu gehort, besucht vnd vnbesucht, wie es genant ist, suln haben vnd besitzen in rechter aigens gwer ledichleich an allen chrieg. wer auer das, des ich nicht entrew, das ieman chains rechts auf dem vorgenanten guet an der leijten chu^enchtichleichen iehen wu^ert vnd es dem Gotzhauss ze chrieg te\at, den chrieg sol ich oder mein erben in auzrichten vnd ausbringen an all ier mue vnd sullen das haben auf allew dew, vnd ich vnd mein erben haben in dem lant. vnd darvber gib ich dem Gotzhaus ze wilhering ze einem vrchu^end disen brief versigelten mit meins Herren jnsigel Herren Hainrichs von Schowmberch vnd mit meins Herren Hern Hainrichs von walse jnsigel vnd auch mit dem meinen. Des sint zeug Her Chunrat von Grebrechshouen, Her Herman vnd der pentz purchgrauen von wessenberch, Eberhart der Tobler, eberhart sein svn, Eberhart der winnberger, wernher von sant veit, Ott der celler ze den zeitten Richter ze wessenberch, Herbort vnd vlrich bruder von perndorff vnd ander piderb Leut gnu^ech. Das ist geschehen, do von Christes gepurd waren drewtzehenhundert jar, dar nach in dem achtzehenten jar an sand valenteins tag.

Source Fulltext: OÖUB 5 (Wien 1868) S. 202, Nr. 203