Nos Vlricus de Noua domo recognoscimus tenore presentium vniuersis tam presentibus quam futuris, quod nos bona deliberatione prehabita, accedente consilio et plena voluntate matris nostre karissime domine Mechthildis pro salute et remedio animarum sororis nostre Agnetis domine de Schawenberch felicis memorie et sororiorum nostrorum Meinheri de Lisnik et Wernhardi de Schawenberch monasterio beate et gloriose virginis in Wilhering et fratribus Cisterciensis ordinis ibidem deo famulantibus contulimus et donauimus in nostra villa, que uocatur Rudweins, sita circa nostram ciuitatem Nouam domum quatuor laneos et duo iugera cum toto censu et cum omnibus vtilitatibus de eisdem laneis et iugeribus prouenientibus per predictum monasterium et fratres ibidem habitantes libere possidendos et perpetuo eo iure, sicut fratres Cruciferi dicti de domo Theutonica apud nos in noua domo a nostris antecessoribus et progenitoribus nec non a nobis bona sibi collata possident atque tenent. Volumus etiam, ut dicti quatuor lanei cum duobus iugeribus sub nostra protectione stare debeant et tutela. Prefati vero fratres in Wilhering pro bonis predictis per nos sibi et monasterio suo elargitis perpetuo annis singulis in crastino beati Colmanni anniuersarium diem obitus sororis nostre predicte cum sollempnitate diuini officii et deuotione debebunt peragere et promiserunt habundantes copiosasque eodem die expensas in pane, vino et piscibus toti conuentui ministrare. In cuius rei testimonium et robur valiturum perpetuo presentes literas scribi et nostro ac matris nostre sigillorum appensionibus iussimus roborari. Actum et datum in Noua domo anno domini M°. CCC°. X°. nono, III. Nonas Nouembris.

Source Fulltext: OÖUB 5 (Wien 1868) S. 253, Nr. 260