Ich Elsbet von chlingelbrvn vergich vnd tvn chvnt allen levten, Daz ich mit gu^etem willen mein vnd meiner svn Fridreichs vnd meinhartz vnd ander meiner erben ab meiner sael vnd meins wiertes Hern Meinhartz vnd aller meiner vordern ze den zeiten, do ich ez wol getv^en mocht, gegeben han den geistlichen herren abpt herman vnd der Sampnung ze wilhering mein aigen, daz ich han datz ofthering, ledichleichen ze haben vnd ebichleichen in aigens gwer an allen chrieg. Wer auer daz, daz dhainer pesser recht danne ich vnd mein erben auf dem vordern (sic) aigen Datz ofthering haben wolt, Der schol geben Den vorgenanten herren ze wilhering fvmf phvnt phenning. Ich lob auch mit sampt meinen herren Des egenanten gu^etes ze ofthering Des gotzhaus ze wilhering gwer vnd seherm sein, als landes recht ist. vnd ze einem vrchvnd gib ich dem gotzhaus ze wilhering disen brif versigelten mit meiner bruder jnsigel albers vnd philipps von alharting, wand ich aigens jnsigels nicht enhan. Des sint zeug Rudolf von alharting, wernhart der hager, Fridreich der Tvngozzinger, Fridreich sein svn vnd ander pider leut genuch. Der brief ist gegeben, do von christes geburd warn ergangen drevzehen hvndert jar, dar nach in dem vier vnd dreyzigistem jar an Sand Laurentz tag.

Source Fulltext: OÖUB 6 (Wien 1972) S. 135f., Nr. 127