Ich Hertweich der Alhartinger vnd mein Hausvraw vraw Peters vnd alle vnser Erben wier vergechen vnd tuen Chunnt allen den, di den prief sehent lesent oder horent lesen, Daz wir mit wol pedachten muet vnd nach vnser vrewnd radt vnd mit vnser Erben aller guetleichem willen ze chauffen haben gewen dem Erbern manne Fridreichen dem Tungozzinger vnd seiner hausvrawn vrawn Kathrein vnd allen iern Erben vnser ansidel ze Aychperch vnd swaz wier da haben, vnd den zehent, also wir in in nucz vnd in gewer haben gehabet ze holcz vnd ze veld, versuecht vnd vnversuecht, also mier in mein vater lazzen hat vnd wir iz von alter her haben gehabet, wier haben auch in daz vorgenant guet fuer vreiz aiˆgen gewen vm achzich phunt phenning gewen (sic) der si vns gancz vnd gar pericht habent. Wier schullen auch dez vorgenancz guets ir gewer sein vnd scherm vnd dez zehent fuer alle ansprach, also vierz (sic) aiˆgen recht hat. Wer awer, daz in chain chrieg da von auf stuent, von swelcherlai sach daz geschech, da verhaizze wier in fuer jch vnd mein prueder Hainreich, swaz sidez schaden nemen, den si pei iern trewn mechten gesagen, den schulle wier in ablegen vnd schullen daz haben auf vns vnd auf aller vnser hab, swo wir dew haben, wer awer, daz wier in daz mit ichtew verzugen, von swelcherlai sach daz geschech, So habent si vns recht ze vodern vnd schullen wier in laisten gen Lincz in ein Erber gasthaus, da si vns hin zaigent, vnd schullen da laisten, alz laisten recht ist, jch vnd mein prueder Hainreiˆch ie der man mit aim chnecht vnd mit czwain pherften vnd da nicht auz chomen, iz wert ê daz vorgenant gelub auz gericht. Daz in dew redt also stet vnd vnverchert peleib, dar vber geb wier in disen prief versidelt jch Hertweich der Alhartinger vnd ich Hainreich der Alhartiˆnger mit vnser paider anhangunden insidel. Der Prief ist gewen, du man zalt von Christes gepuert Tawsent jar, Drewhundert jar, darnach in dem sechs vnd dreisigisten jar an dem Eben weinacht abent.

Source Fulltext: OÖUB 6 (Wien 1972) S. 225f., Nr. 221