Wir graf Hainreich von Schawnberch bechennen und tun kund offenleich mit dem brief fu^er uns und all unser erben, daz wir mit verdachtem muet mit guetem willen und nach weysung unsers rats all die brief und alle die recht di das gotzhaus und die herrn ze Wilhering von unsern vorvodern seliger gehugnuzz habent gehabt, und auch habent her bracht untz an uns an allen chrieg und alz ir brief und hantfest sagent di wir gemeinclich gesehen und geho^ert haben, dew selben recht di erchennen wir all und verneuen in die also recht und redlich, daz weder wir noch unser erben dhainer chunftiglich noch dhainer unser richter von des vorgenanten chlosters ze Wilhering aigen noch von seinen lewten wellen noch ensulen dhain sach richten chlaine noch grozze an alaine soliche sache di da ziehent an den tod, daruber si nicht ze richten angeho^ert. Allew andere sache sull der apt oder swem er sein phleg emphilicht enden und richten an allen chrieg und irrung. Wa^er aber daz des nicht geschehe daz der apt oder sein verweser yemant daz recht verzug oder versagt von seinen lewten die dem gotzhaus zugehorent daz man bewaren und fur war gesagen mag, denselben mugen wir oder welicher zu der zeit unser richter ist von derselben sach wegen und zu der selben stund daz recht wol getun, und sullen auch di recht anderswa nyndert ziehen den an uns oder welicher ze der zeit unser oder unser nachkomen richter ist. Daruber bestetigen wir und vernewen dem selben gotzhaws ze Wilhering alle die recht di ez hat von unsern vorvodern auf allem irem guete daruber si hantfest habent, und besunderlich auf zwain gueten ze Hitzing auf zwain ze Tening auf aim ze Pesching und auf aim ze Ofthering. Und daz di rede dem gotzhaus ze Wilhering stet und unzebrochen ewigliche beleibe, daruber so geben wir ze urchund den herren ze Wilhering den brief versigelten mit unserm chlainen insigel, der geben ist ze Schownberch an samcztag nach sand Lucceyn tag do man zalt nach Christes gepurd drewczehenhundert und darnach in dem vier und sibentzigisten jar.

Source Fulltext: OÖUB 8 (Wien 1883) S. 729f., Nr. 715