JCH Vlreich der Perndorffar vnd mein Hausuraw Elspet vnd all vnser erben, di wir yeczunt haben oder noch chunftig werden, wir veriechen offenleich an dem brief allen den, di in sehent, ho^erent oder lesent, di nu lebent oder hernach chunftig werdent, Daz wir mit guetem willen vnd mit wol bedachtem muet vnd nach rat vnser besten frewnt aller zu der zeit vnd weil, do wir ez wol getuen mochten, recht vnd redleich verchauft vnd zu chauffen gegeben haben meint lieben Swager Stephan dem pyber vnd seiner hausurowen dorothen vnd allen iren erben vnsern hof genant datz dem Chnollen, der vnser Rittermassiges aygen gewesen ist, vnd ein hofstatt vnd ein Mu^el da bey mit allen eren, rechten vnd nu^eczen, vnd dar zu gehort ze holcz vnd ze veld, versu^echt vnd vnuersu^echt, wie so daz genant ist, Alsz in vnser voruordern inngehabt vnd also er von alter her ko^emen ist, vmb ein gelt, dez vns wol genu^egt vnd dez wir gantz vnd gar gericht vnd gewert sein an all vnser schaden. wir geantwurten in auch den obgenanten hof vnd hofstat vnd di Mul auz vnser nutz vnd gwer in di irn mit aller zugeho^erung vnd also er von alter her ko^emen ist, vnd verzeichen vns auch dez obgenanten hoffs, daz wir hin fu^er chain ansprach auf den obgenanten hof vnd auf di hofstat noch auf di mu^el nymmermer gehaben sullen weder mit recht noch an recht in dehainerlay weis nicht. Wir sein auch dez obgenannten hofs vnd der hofstat vnd der mu^el vnd mit alle dev vnd dor zu gehort, ir recht gwer vnd fu^erstand an aller stat, vnd in sein not vnd durft (geschiecht)! vnd also recht ist in dem land ob der Enns. wser aber, daz im oder seinen erben an der gwerschafft icht abging, wietann schaden si dez naemen, den stephan oder sein hausurow vnd sein erben gesprechen mu^egen an ayd vngesworn vnd vngerecht, den selben schaden sullen wir in gantz vnd gar ablegen vnd wider cheren vnd daz sullen si haben datz vns vnd datz vnsern trewen vnd dor zu auf aller vnser hab, wo wir di indert haben oder lazzen auf wazzer oder auf land, versucht vnd vnuersucht, in welher herschafft oder gericht di gelegen ist, der mu^egen si sich wol vnderwinden mit vnserm guetleichen willen vnd wort vnd sullen auch dez vnengolten sein gen vns vnd gen allen richtern vnd swez wir mit in dor vmb an erhu^eben mit recht oder an recht, dez habent si allez behabt vnd wir verlorn. Ich verzeich mich auch obgenante Elspet der margengab vnd haimsteur, di auch ich gehabt han auf dem obgenanten hof, daz ich auf den obgenanten hof dehain ansprach nymer mer gehaben sol weder mit recht noch an recht, mit vrchund dez briefs. wir sprechen auch, wer, daz yemant her fu^er chem, der pesser erb dor zu wolt sein, dann wir, der hat vollen gewalt ze lo^esen vmb zwayhundert phunt gueter wienner phenning all jar iaerchleich vierzehen tag vor Liechtmess vnd vierzehen tag hin nach. Daz di red also staet vnzebrochen beleib, Dor vber gib ich obgenanter vlreich der perndorffar vnd mein hausurow Elspet den prief besigelten vnd besta^etten mit meinem Anhangunden jnsigel, dor vnder ich mich obgenante Elspet verpint mit meinen trewen an aydes stat allez daz stat ze haben vnd ze volfu^eren, daz oben an dem prief geschriben stet, vnd dez zu einem warn steten vrchunt vnd zu einer pessern sicherhait vnd gezeugnuzz vnder meiner lieben frewnt wernhart dez perndorffar vnd Othachker dez pyber vnd A^echerleins dez volchratz vnd mit dez erbern Chunratz diczeit purkgraff ze wa^essenberg Anhangunden jnsigeln, di si all an den prief gehangen haben durich vnser vleizzigen pet willen jn vnd allen irn erben an schaden. Der brief ist geben, do man zalt von christes gepurd drewzehen hundert jar vnd dor nach in dem Acht vnd sibenczkisten jar dez freytags nach dem Svnbentag.

Source Fulltext: OÖUB 9 (Wien 1906) S. 472-474