Ich Chunrat Regenspurger, dy zeit Richter zu Attenshaym, Kathrey mein hawsfraw und all unsere erben, wir verichen/ und tun chund mit dem gegenwartigen prief allen den, dy in sehent, horent oder lesent, das wir mit wolbedachtem/ muet und nach unser pesten freunt rat und aller unser erben gu/otlichen willen und auch zu der zeit, do/ wir ez mit recht will getun machten, recht und redleich geben, gemacht und geschaft haben sechs schilling/ wyenner phennig ewigs dinst je/arleich zu dien acht tag vor sand Pernhartz tag den erwirdigen geistleichen herren,/ dem abbt und dem convent ze Wilhering von unserm haws zu Attenshaym gelegen an dem ekk da man get auf/ das haws und dy obgenanten sechs schilling pfennig schol man raichen und geben dem pittantzner ze Wilhering/ unverzogenleich, darumb er dan schol chauffen den herren in das resent an sand Pernhartz tag weis prot/ und visch. Derwarten, das si in ir andacht pitten und gedenchen umb dy sel hernach genent Chunrat des/ Regenspurgers, Kathrey seins hawsfraw, Hainreich des Regenspurger, Chunigund seins hausfraw, Walther des Regens-/ purger, Margareten seins hawsfraw; der gemelten sel schullen sew jerleich ayn jartag pegen zu Wilhering/ nach irs ordens gwonheit mit mess und vigil inner acht tagen vor sand Pernharts tag oder hin nach./ Wer aber, das man dy obgenanten sechs schilling pfennig dinst nicht geb auf dy egenanten zeit, so schol der/ richter ze Attenshaym dem pittantzer ze Wilhering phannt in anttw/eten, das er der selbigen pfennig davon/ wol mug bechomen. Fund man aber nicht phannt, so schol man in des grunts und des haws beltigen/ als lang und als vil uncz das er des obgenanten gelts davon bechumpt und das schol nyemant irren mit/ recht noch an recht geistleich noch weltleich. Wer dann, das si verdolten phaenten, so sind sew dem richter/ vervallen zwelif pfennig zu wandl das dy red dun das gescheft also ewigchleich unzebrochen und un-/ verchert peleib das las wir mit unserem trewn alles ze laisten und stet ze haben daruber zu aynem warn/ (suchtigen) urchund und enctzig gedaechtnuzz geben wir in den prief versigilten. Ich obgenanter Chunrat Re-/ genspurger fur mich und all mein erben mit meinem aygen anhangunden insigl und zu ayner pessern/ sicherhait und gedachtnuzz haben wir fleyzz gepeten Micheln Mülholczer, dy zeit phleger zu Ro/etenehk/ und Hannsen Lerberger, purger ze Attenshaym, das sy paid irew insigl der sach zewgnuzz an den prief/ gehangen haben, in paiden und all iren erben an schaden. Der prief ist gewen nach christ gepürd vïrzehen/ hundert jar und darnach in dem dritten jar an dem heyligem pluemostertag.