Ich Hanns der Gundersstorffer, chorher und di zeit siechmaister dez gotshaws unser frawn ze Newnburg klosterhalben vergich und tun kund mit/ dem brief allen lewten, die in sehent oder horent lesen, daz fur mich kom, do ich sazz an offem rechten Hanns der Chressling und clagt/||
mit vorsprechen an dez gotshaws stat von Wilhering wann er vollen gwalt het ze clagen ze flust und ze gewin hincz desselben gots-/ haws rechten gelter gut gegen ainem haws und hofstat daran gelegen ze Nwenburg an dem guez ze nachst Hannsen dem Philipper,/ do man alle iar von dient unser frawn gotshaws ze Newnburg in ir siechambt virczehen wienner phennig an sand michels tag/ und funfzehen wienner phennig an sand mertein tag, all ze grunt dinst und ain wienner phennig ze voitrecht an sand markx-/ tag und drew hochczeit huenner alz ez mit alter her komen ist und dint auch zway phunt gelts ze vleiczins in daz obgenant/||
gotshaws ze Wilhering alz desselben gotshaws urchund brief dar uber lawt und nicht mer. Und clagt hincz der ubertewrung/ dez benanten haws und hofstat daran umb virczehenthalb phunt wienner phennig nach meins registrum sag und meldet/ auch dez gotshaws schaden ze Wilhering und pat dar umb gerichts und fragen waz recht wer; do sagt ich umb do (wart) ertailt zu/ dem rechten, ich solt Wernharten am Griezz, der des haws und hofstat darin bey nucz und gwer daz und auch daz gelt gelten/ solt ain furbot lassen werden und dar zu allen den, di rechtens daran (jachen), kristen und juden ob daz yemant wolt verantwurten/ so geschech darnach waz recht wer; daz furbot ward gesagt allen, den man ez ze recht sagen solt, und fronbot daz berreit alz er ze recht/ solt daz wolt niempt verantwurten; dar nach gemel mit frag und mit recht seind daz furbot wer berreit und daz niembt het wellen/ verantwurten, ich solt di gwer der ubertewrung dez haws und hofstat inn haben vierczehen tag in der zeit den obgenanten Wernharten/ am Griezz und dar zu allen den, di rechtens daran jachen, cristen und juden, anpieten, ob sich yembt mit dem obgenanten Hannsen/ dem Chresling an dez gotshaws stat von Wilhering richten wolt; und geschech dar nach aber (anz) recht wer, nu ist niemant komen,/ der sich mit im reaicht hiet, alz sein clag stund da gemel mit frag und mit recht ich solt in an dez gotshaws stat von Wilhering/ der ubertewrung dez haws und hofstat daran gwaltig machen und an di gwer seczen allen sein frumen do mit ze schaffen an alle/ jrrung, alz ez dem selben gotshaws am pesten fuegund ist, dar umb solt er mit mein recht geben, daz hat er getan. Ez gemel auch/ mit frag und mit recht, ich solt im an dez gotshaws von Wilhering stat mein behab brief dar uber geben, daz hab ich allez/ volpracht mit urchund dez briefs versigelt mit meim aigen insigel. Auch ist der sach zeug mit seim insigel der erber/ Hanns der Stekch, purger ze Newnburg, im an schaden, wann im der handel chunt ist und andern erbern lewten genug./ Der brief ist geben nach kristi gepurd virczehen hundert jar dar nach in dem fumftem jar dez phincztags vor sand michels/ tag.