Wir Jorg von gotes genaden bischove ze Passau bekennen und tun kunt offenlich mit dem/||
brief: Als unser vorvodern bischoven ze Passaw seliger gedechtnuzz die erbern geistleichen unser/ lieb andechtig, den abbt und gotzhaus ze Wilhering sand Bernharts orden unsers bistumes solhe/ genad getan und freihait gegeben haben, daz si ierleich ain pfunt weits salts mautfrei und an/ alle furvart frei furen mugen auf der Tunaw und auf dem In an unsern mautten ze Passau/ und ze Obernperg, als das alles in derselben unserer vorvodern briefen, die si darumbe haben aigen-/ lich begriffen ist, haben wir angesehen ir lautter andacht und durch gots willen in und/ dem benanten irem gotzhaus die obgenanten genad und freihait also bestêtt, und bestêtten/ in auch die wissenlich mit dem brief. Davon gepieten wir unsern getrewn lieben, unseren maut-/ tern ze Passaw und ze Obernperg, die gegenwurtlich sein oder in kunftigen zeiten werden,/ daz si den obgenanten abt und gotzhaus bei denselben genaden und freyungen beleiben lassen und/ dawider nicht tun, noch gestatten zetun in chainer weis wan wir das gar ernstlich mainen/ mit urkunt des briefs. Geben ze Ebelsperkch an sant angneten tag nach christi gepurd/ vierzehenhundert iar und in dem funften iare.