Ich Wernhart der Perndorfer, mein haẅsfraẅ und all unser erbenn gegenburtig und chẅmftig, wir vergehen offenleichen mit dem/ prieff und tẅn chwnt allen den, die den prieff sehent, hornt oder lesent, daz wir mit wolbedachtem mẅet und mit gẅetem willen/ all unser erben und pesten freẅnt rat und gwunst, aẅch zẅ der zeit und weil, do wir es mit recht wol getun mochten, recht/ und redleich verchaẅft und zw chauffen haben geben dem erbern gotzhaẅs zẅ Greimesteten zẅ einem rechten chaüff nach landes recht/ unser gẅet genant zẅ Praẅtanbeg, daz freis, rittermessig aigen ist mit aller seiner zẅegehorwng, wesucht und unbesuecht nuczz/ da von aẅs gezogen, gelegen in Greimesteter pfarr und in Waessenberger herschaft, daz hab wir dem erbern goczhaws geben umb/ ein gelt, dez uns wol genẅet und dez uns der zechmaister an dez goczhaẅsstat schon gancz und gar gericht und pezalt hat zẅ/ rechten taegen an all unser scheden; wir haben aẅch daz obgenant gẅet mit all seiner zẅe gehörwung dem zechmaister geantburt/ aẅs unser nẅcz und geber in dez goczhaẅs nẅcz und geber mit all der staet, die dar zẅe gehort und daz goczhaẅs dar uber/ pedarf und twn aüch uns und all unser erben dez obgenanten gẅecz gancz verzeichẅmb mit dem gegenbẅrtigen prieff,/ daz wir weder mit recht, noch an recht nuzz mer da gegen zẅ sprechen schüllen haben. Wir sein aüch dez chaüfs/ und dez gwecz wir und unser erben dez goczhaws rechter geber, scherm und furnstant fwir all ansprach an all der stat wo sein/ nowt und dwrft gesiecht, also chawf freis aigens gwet recht hat in dem lant ob der Ens. Und ging aber dem goczhaws/ an der gebe/rschaft icht ab, waz man dez rechtleich scheden nem, den der zechmaister gesprechen moecht pey seinen trewen an aid und/ ungesboren, den selben schaden allen schwll wir dem goczhaẅs allen ablegen und wider chern gancz und gar und schol man daz haben/ dacz uns und unseren trewen und dar zwe aüf aller unser hab, wesüecht und unbesuecht, daz dem ogenant goczhaẅs der chaẅf/ und deẅ red und dew handelung allew sand staet und unzebrochen peleib, dar uber geben wir den prieff versigelt mit meinem/ aigen anhangunden insigel und mit meins lieben sbager Symon dez Aeschpein und Eẅtachker dez Volchrat ir paider anhangunden/ insigel zẅ gwueter gezeẅgnwis dwrch unser vleizzigen pet willen, in und iren erben anschaden; under dew sidel allew verpint/ sich mein hausfraẅ und all unser erben mit iren treẅen an aides stat, alles daz war und staet zẅ haben, daz an dem/ prieff verschriben ist. Der prieff ist geben am freita nach sand floriantag nach christe gepurd virzehen hundert jar/ und in dem sechsten jar.