Ich Thoman Vascziecher, purger ze Newnburg klosterhalben und ich Anna sein hawsfraw, wir vergehen fur uns und all unser eriben offenleich/ mit dem brief und tun kund allen lewten, daz wir mit wolbedachtem mut ze der zeit, do wir ez wol getün mochten und mit unsers ambtmans hant dez er-/ bern mann Hannsen dez Stekchen, die zeit ambtman unser frawn gotshaws ze Newnburg mit furczicht verchaufft haben unser haws mit aller zugehorung,/ gelegen ze Klosternewnburg bey der Tünaw ze nachst Symon des Wisents haws, doman alle iar von dint unser frawn gotshaws ze Newnburg in das cheln-/ ambt auf die obern kamer zwelif wienner phennig ze gruntrecht an sand merten tag und fümfzehen phennig ze furgeding an sand jorigen tag und sechs/ phennig ze voytrecht zu den etaydingen […] und nicht mer, daz [benant] haws mit aller zugehorung ein nüczen und rechten, alz es von alter her ko-/ men ist, haben wir verchaufft und geb[en um]b hundert phunt und […] allez wienner phennig, der wir aller gancz und gar gewert sein ze/ rechten tagen dem beschaiden Hannsen dem Kresling, purger ze Tuln, sein hawsfrawn Barbara und baider eriben furbas ledigileich und (…)leich/ ze haben, allen iren frumen domit ze schaffen, verchau[ffen] […] [an alle jaring] alz in daz aller pest fuegund ist; wir/ antwurten in ir gwalt mit dem brief drey gancz ver[…] […] saligen ain kauf brief von frawn/ Kathrein, desselben Nurenberger witibn und mer ain chaufbrief […] frawn Kathrein sun auch genant Andre Nürenberger, die lawten/ all drey wie ez von alter her von ainem hincz dem andern chomen sey ob in das ansprechig wurd mit recht, wenn si uns die egenanten/ brief gancz und versigilt wider gebent ze rechter zeit, dann so sullen wir fur sew sten in die gwerschaft und ir scherm sein nach dez lanndes/ recht in Österreich. Wer aber, daz die brief verloren oder zeprochen wurden, so sey wir und ain yegleich ambtman des obgenanten haws/ dez scherms unengolten; get in daran icht mit recht ab, daz sullen wir in alles ablegen, ausrichten und widerchern an ir schaden und müe/ und sullen si daz alles haben auf uns und unverschaidenleich auf allen dem gut, daz wir haben, wir sein lebentig oder tod; auch hab ich Thoman/ Vascziecher inn ain tail brief, der lawt uber das egenant haws und uber ain weingarten an der Weydinkchleiten dem vorgenanten haws ze scherm/ und ze hilf und dez ze urchund der sach gib ich Thoman Vascziecher mit gesambter hant in den brief versigilt mit meim aigen insigil und/ mit des egenanten ambtmans insigil. Darczu hab wir gepeten den erbern Symon den Wisent aufm Anger, ainer des rats der stat ze/ Chlosternewnburg, daz er der sach zeug sey mit seim insigil, im an schaden. Der brief ist geben nach christi gepurd virczehen hundert/ jar darnach in dem sibenten iar dez nachsten eritags vor sand giligen tag.