Wir abbt Jacob und der gancz convent unser frawn gotzhaus ze Wilhering verichen und tün chund allen lewten, dy den prief/ sehent oder horent lesen, das wir durich gotz willen haben angenomen ayn sum geltz von unserem lieben ingot Veitt Mawtter zu/ Asschach von sunder andacht und gnaden, dy er zu uns und unserem gotzhaus hat, das [wir] darumb chauffen sullen ayn güt,/ das freycz aygen sey so man (vaift) mug umb dy selben vorigen sum geltz haben wir chauft ayn güt gelegen ze Nidern Polsencz/ [zu nagst des Geyselperger hof] in sand Mareinchirchen pharr, das [freys rittermessigs aygen ist;] von dem vorgenanten gut sullen/ wir ym jerleich ayn [jartagen] in unserem gotzhaus ze Wilhering an unser fraun abent Marie als si hat haymgesücht/ sand Elizabeth des nachten mit vigili und des morgen mit sel ampt nach unser ordens gwonhait und den desselben/ tags sol man dy herren in den resent trosten und geben zu pessrung ir phruent visch und weispreut derboten, das si/ dester willichleicher und andachtigchleicher in allem irem gotzdienst gedenchen seiner sel trostung und das sol er haben datz unseren/ trewn; wer aber das der obgenant jartag versaumpt oder verzogen wurt auf den […] tag, so sol er oder sein erben oder wem/ er darzu trawt, sich des obgenanten gut ze Nidern Polsencz underwinden und in hern oder zu aynem andern gotzhaus geben,/ uncz das wir volfurrn und volbringen, das oben an dem prief geschriben und [bestimbt] ist das hab wir alls stet ze haben/ mit unseren trewn; dar uber [u] aynem warn und vesten urchund der obgeschriben sach geben wir inn den prief zu ayner/ ewigen gedechtnuss versiglt mit unseren paiden anhangunden insigln. Der prief ist geben nach christ gepurd virze-/ hen hundert jar und in dem newnten jar an sand jeorigen tag des heyligen martrer.