Ich Wolfhart Kirichmair ze Schonhering, mein eleiche hausfraw und all unser erbn vergehen und tuen kundt/ allen leuten, die den brief sehant, horent oder lesent, das wir mit wolbedachtem mut, rat, gunst und willen unser/ nagsten freundt und zu den zeiten, da wir ez mit recht wol getun machten, recht und redleich zekauffen habn/ gegeben unser hueb genant datz Obn Inn, die unser lehen ist gewesen von dem Perg ze Tegernpach gelegen auf/ dem Michelm Hard und in Alkover pharr ze holcz, ze veld, waid, wasser, wismad, davon nichtz ausge-/ nomen, alls wir die selber inne und genossen haben und alls sew von alter gewonhait her ist/ komen, dem erwirdigem gaistleichen herrn abbt Jacoben ze Wilhering und dem gannczen convent daselbs, die/ in der edel her her Andre von Polnhaim geaigent hat umb ain gelt, des wir von in ganntz und gar bericht/ und bezalt sein an all unser scheden; wir antwurtten in auch die obgenantten hub mit allen eren, rechten und/ nuczen und darczu gehort oder davon bekomen mag aus unser nucz und gewir in ir nucz und gewir/ und verczeihen uns der mit rechter furczicht, das wir, unser erben oder ander yemant von unsern wegen/ hinfur ewikchleich chain ansprach noch fadrung darnach sullen haben noch wellen gewinnen inchainer-/ lai weis weder mit recht noch anrecht, chlain noch gros angeverd; si mugen auch mit der obgenantten/ hueb und aller ir zugehorung allen iren frum schaffen, wie si verlustet, alls mit anderm irem aigem gut mit/ versetzen, verkauffen, geben machen, wem si wellen, das ist unser gutleicher will und wort; wir sein auch der ob-/ genanten hub mit aller ir rechtleicher zugehorung ir recht gewern und furstand alls offt in des not/ geschicht nach dem lannds rechten ob der Enns. Gieng in awer mit recht an der gewerschafft icht ab, des/ se zu schaden komen […] Wilhering oder […] (anwalt) […] macht an aid und/ an alls recht iren slechten wortten darumb zuglauben, den selben schaden wellen wir in ganntz und gar/ ablegen und widerkern und sullen auch daz haben, dacz uns, unsern trewn und darczu auf allem unserm/ gut, wo wir das haben oder noch gewinnen, es sei erib, aigen, lehen oder varund gut, nichtz davon ausgeno-/ men, der mugen se sich vor aller menikleich wol underwinden und sullen auch des unengolten sein gen uns,/ allen richtern und ambtleuten, was wir, unser erben oder ander yemant von unsern wegen uber das/ alles mit in chriegen oder rechten wollten, wie sich das fuget, es wer mit recht oder an recht geistleich/ oder weltleich, das haben wir an aller stat unrecht und verloren und das obgenant gotzhaus und/ herren gewinnen und behabt das in daz war stet und unczebrochen beleib, gib ich in den brief ver-/ sigelt mit der erbern und weisen Tybolden des Paleitter, Thoman des Aichperger, die zeit richter ze/ Everding und Peter des Rewter aller anhangunden insigl, die sew daran gehangen habend durich/ meiner vleissiger gebett willen, in und allen iren erben an schaden; darunder ich mich obgenantter/ Wolfhart Kirichmair, mein eliche hausfraw und all unser erben mit unsern trewn verpinden, alles/ das steet zuhaben, daz an dem brief verschriben ist. Das ist geschehen, da man zalt von christi geburd/ vierczehenhundert iar darnach indem drewczehenttem iar an mentag nach sand Andres tag des hei-/ ligen czwelfboten.