Ich Wernhart der Perndorffer, mein hawsfraw und all unser eriben, wir vergehen und tun chund offenleich/ mit dem brieff allen den, dew in sehent, horent oder lesent, das wir mit wolbedachtem muet ze der zeyt und/ weil, do wir es mit recht wol getun mochten, recht und redleich verchawfft und ze chawffen haben geben ain/ rechtz freys chawffrecht noch dem lannds recht ob der Enns awff unserm gut [genant] ze Vyecht, das Ober Guet/ gelegen in Greymhartsteter pharr und in Wassenberger herschafft, Wernharten dem [Spytzer], seiner hawsfrawn und/ ir payder eriben umb ein gelt, des wir von in gancz und gar gericht und gewert sein worden zu rechten tagen/ an all unser schaden in solicher beschaiden, das sew uns und unsern eriben all jar jarleich do von raichen und dyenen/ schullen zu unser frawn tag ze rechter dinst zeit newn schilling phening und zway phunt pawm o/el oder fu/er/ ein phunt zehen phening und ain halbs schot harib, drey cha/es ye ain fur vyer phening, drew huener, dreyssikch/ ayr und zehen phening fur weinacht prott und nicht mer; wann sew dy vorgenant vordrung awsrichten,/ so habent sew gedint und gestewrt; wir geantwurten in awch das ob genant chawffrecht awff dem egenanten guet/ in chawffrechtz weys aws unser nucz und gewer in ir nucz und gwer mit aller zugehorung, versucht und unversucht, und sein/ awch des egenanten chawffrechtz awff dem obgenanten guet ir rechtleich gewern und furstand fur all ansprach,/ wo und wann in des not und durfft geschiecht, also chawffrechtz und lanndes recht in dem lannd ob der Enns/ recht ist; sy mugen irew recht und ir chawffrecht wol verseczen oder [verchawffen] wy [sy] des aller pest fugund ist an irrung/ und hindernuss, uns und unsern eriben wann in des not und durfft geschiecht; und wann sich das guet verbandelt/ mit verseczen oder verchawffen, der ain awff vert, der schol uns [geben sechzehen] phenig und [der do] abfert awch/ [alls vil und nicht] mer; und [das] sol alles geschehen mit unserm willen und mit […] und […] gut nuczleich/ sey und stifftleich und peyleich das guet in hab mit urchund des brieffs […]/ […] mit meines des vorgenanten Wernharts des Perndorffer eygen [anhangunden] insigll und ze pessern/ sycherhayt und zewgnuss hab wir vleyssichleich gepeten […] sein insigell/ an den brieff gehangen hat, im und sein erben an schaden. [Der brief ist geben da man] zalt von christ/ [geburd virzehen] hundert jar darnach in dem funffzehentem [jar] […] tag.