Ich Hainczl Verig, Mager Ulleins sun, dieczeit gesessen an der herren urfar zw Wilhering gegen Attenshaym uber Agnes mein hawsfraw und/ all unser eriben veriehen und tun kund mit dem gegenwurtigen brieff allen den, dy in sehent, hornt oder lesent, das wir mit wolbedach-/ tem mu/et zw der czeit, do wir es wol getun mochten, nach rat und gunst unserr nachsten frewnt und erben, unser kawffrecht an der/ Vischwaid mit allen eren, nuczen und rechten zw veld, zw darf, zw aw, zw wasser und mit aller irer zwgehorung, versucht und un-/ versucht, nichts ausgenomen, als wir das selber inngehabt und verdiennt haben, gelegen zw Rudlestorff in Heresinger pharr;/ das vorgenant kawffrecht an der benanten Vischwayd mit aller irer zwgehorung, als das unser pruder der Veytt halbs inn hat/ und schol ye ains tayls geleich so vil sein als des andern an als gevard, haben wir unsern tayl gantzen verchawfft und zekawffen/ geben den erwirdigen geistleichen unsern lieben gnadigen herren abbt Jacoben zw Wilhering und dem conventt und irem gotzhaws/ daselbs umb ayn gelt, des wir gantz und gar gericht und betzaltt sein an vercziehen und an all schaden; wir anttwurtten auch/ das vorgenant kawffrecht an der benanten Vischwayd mit aller irer zwgehorung aus unser nutz und gwer in ir nucz und gwer,/ als wir es von alter haben inngehabt, das sy hinfur damit allen iren frumen mugen geschaffen, mit verseczzen, mit verkawffen,/ wie oder wem sy wellent, das ist unser gutleicher wil und wart; wir sein auch des vorgenanten kawfrechts an der egenanten/ vischwayd mit aller irer zwgehorung ir recht gwern und furstand als oft in des not und durfft geschicht, so solichs kawfrechts/ recht ist in dem lannd ze Osterreich ob der Enss. Gieng in aber an der gwerschaft icht ab, wie sich das fuget mit dem rechtenn,/ das sy oder ir gotzhawss zw schaden chamen, denselben schaden allen wellen und schullen wir in erstatten, ablegen und wider-/ chern an ayd unberecht und ungesworn und schullen sy das haben, dats uns, unsern trewn und darczw auf aller unserer/ hab, wo wir dy haben, lassen oder gewinnen auf wasser, auff land, der nichts ausgenomen, der mugen sy sich wol under-/ winden an furpot, an chlag und an als berechten so lang und als verr untz in alles das von uns ausgericht und gehalden/ wirt, das hie vor an dem brief geschriben stet; und was wir, unser erben oder yemand ander von unsern wegen dawider/ wolten kriegen mit geistleichem oder weltleichem rechten oder an recht, das haben wir an aller stat verlorn und sy behabt/ und gewunnen; das dy red und der kawff also stet und untzebrochen beleib, daruber geben wir in den brief versigilten/ mit der erbern Thomans des Freytleins, dieczeit richter indem Tunawtal und Dietreichs des Tewrbanger und Peter des/ Rewtter, aller dreyer aygner anhangunden in sigilen, dy sy an den brief gehangen haben, durich unserr fleizziger pet willenn,/ in und iren erben anschaden; under dew insigil verpint ich mich obgenanter Haynczl Verig, Agnes mein hawsfraw/ und all unserr erben mit unsern trewn in aydes weys, alles das stat zehaben, das oben an dem brief geschriben ist, wann/ wir selber nicht aygner insigilen hiten. Der brief ist geben nach kristi gepurd viertzehenhundert jar darnach in dem/ sechtzehendem jare an sand Andres abentt des heyligen zweliffpotenn.