Ich Jorig und ich Urban, gebrueder die Volkrat bekennen fur uns und fu/er all unser eriben und tun kundt offenleich mit dem brief/ allen, den er furkumbt sehent, hornt oder lesent, das wir wolbedachtleich zue der zeyt, do wir es durich recht wol getun mochten, recht/ und redleich kaufleich zu kauffen geben haben ganczen zehent auf dem Luss genantt der Ober Luss ausserhalbs veldes auf der hoech/ pey dem weg gen Hemad verrs in dem guet zu Reisech in Gremhartsteter pharr und Wessenberger lantgericht gelegen, der rechtts/ freys aigen ist, dem erbirdigen geistleichm herrn abbt Vlreichen zu Wilhering, dem convent und dem gotshaus daselbs umb ayn/ gelt, des wir gancz und gar gericht warden sein an allen schaden; also antburtten wir in den zehent mit seiner zuegehorung und mit aller/ der stett, so wir daruber haben und gehabt haben wissentleich mit dem brief aus unser und aller unser eriben nucz und gewer in ir/ und ierer nachkomen nucz und gewer, also das sy allen iren frumen nun furbaser damit gehandeln und getun mugen nach allem irem/ wolgevallen nuczen, verkauffen und geben, wemb und sy wellent an unser und aller unser eriben widersprechen, irrung und hindernuss;/ und tun uns des also ewikchleich ewige gancze furczicht mit dem brief dahyn noch dagegen nymermer zesprechen mit kaynerlay sachen,/ geystleicher noch weltleicher [rechten] […] und wir sein auch des zehents und des kaufs auf dem benantten Luuss genczleich ir/ recht gewern, scherm und furstand fur all rechtleich ansprach, [wo und wann in des zu recht] […] [fur allen schaden]/ sten und sein und den zu uns, allen unsern erben, zu unsern trewn […] als dan schaden […] freys guets [lanndes ob]/ der Enns recht ist, mit urkund des [briefs] besiglten mit des edlen Fridreichen des Volkrat, unsers lieben vettern und des edeln Casparn/ des Kresling, an der zeit phleger zu Ottenshaim mit ir paider anhangunden insigiln, die sy an den brief gehangen habent, durich unser/ fleissiger pet willen, in und iren eriben anschaden; under die insigel wir uns mitsambt allen unsern erben verpindten mit unsern trewn/ in aides weis, alles das war und stet zehaldten, so an dem brief geschriben stet, wann wir dieser zeit grabens insigel nicht enhetten,/ der geben ist nach der purdt kristi im vierczehenhundertisten und acht und dreissigisten iaren an eritag vor sand Johanns tag vor/ dem guldenn tor.