Ich Anna, Micheln des Schefmayr hawsfraw und Vlreichen des Angarmair seligen tochter und ich Jorig Luegmair bekennen/ aintrachtikleich mit einander fuer uns, unsre geswistred und unser lieb vetterrn und müemen fraẅn Angnesen, Mertein zu Befrachting saligen/ hawsfrawn und fuer Hannsen, iren sun, der yczund nicht pey lanndt ist und fur Hainczlein, Gabrihel, Jorigen, Warbara, Marigrethen und Ang-/ nesen, geswistred, Hannsen des Winkchelmair unsers lieben vettern säligen kynder und fur Kathrein, Mertein des Weysmair zu Tenyng hausfrawn und/ Marigrethen, Hertlein des Newnmulner hausfrawn auch unsers lieben vettern und vater Mathes des Luegmair saligen tochter, dafur wir uns,/ ich obgenantte Anna und ich benanter Jorig Luegmayr fur sy alle wissentleich mit dem brief an nemen und thün kund fur uns und aller unser/ eriben und miteriben allen lawten, lembtigen und kunftigen, den der brief furkumbt sehent, horent oder lesent, von solicher gerechtikait geltsuld/ zuepruch und vadrung wegen, so wir haben gehabt hincz dem erwirdigen angedechtigen in got, abbt Vlreichen zu Wilhering, unserem genadigen/ herren auf dem Porczlehen im Terenpach in sand Vlreich pharr gelegen, de dan yczund der Seyden Peter auf siczt umb die selb geltschuld und/ umb all ander zuespruch wir gegen im in stossen worden und stuemen souer das uns frumb erber lawtt, die wir uns ze bayder seyt haben lassen/ gevallen und uns miteinander genczleich bericht und aller sach entschaiden habent, also das uns fur all unser vadrung, geltschuld und gerechtikait/ des obgenantten Porczlehen ayn sumb phennig gesprochen und gevallen sind, der wir von dem egenantten unserem genadigen herrn und erbirdigen abbtt/ Vlreichen zu Wilhering gancz und gar ausgericht und beczalt worden sein zu rechter zeit an aller unser scheden; darauf haben wir fur uns und fuer/ aller unser miteriben, als dan oben an benent sind, dafur wir uns wissentleich an nemen und fur aller unser eriben lawtter furczicht getan und/ verczeichen uns auch also wissentleich in kraft des briefs, das wir noch, aller unser eriben und miteriben noch manikchleichs nymants von unser aller/ wegen nun furbaser zu dem obgenantten erbirdigen, unserem genadigen herrn abbt Vlreichen zu Wilhering, dem gotshaws und allen convent daselbst,/ allen iren nachkomen auch zue dem vorgenantten Porczlehen aller seiner zuegehorung noch allen den, die das inne habent, nuczent und nyessent und/ besiczent auch noch zu allem anderm ierem guet kaynerlay vadrung, geltschuld, eribschaft noch gerechtikait auch noch kaynerlay zuespruch nymmer/ gehaben noch gewynen sullen noch enbellen weder mit recht noch an recht, in kayner anderen weys, vill noch wenig, sunder sy mugen allen iren/ frumen damit schaffen, mit verkauffen, verseczen, schaffen gmachen und geben wemb und sy wellent und des damit hanndeln und thun wie sy verlust/ an unser, aller unser eriben und miteriben und an manikchleichs von unseren wegen widersprechen, irrung und hindernuss ungeverleich; wann/ was wir oder ander ymants von unsern wegen nun furbas zu rechten oder kriegten an erhuoben oder mer vadrung welten haben wie und wo sich das/ fueget und begeb, darumb geben und bekomen wir inn an aller stat an dem erstem furkomen gegen unbehabnuss und recht und uns uberall verloren/ und unrecht und sein in auch dan darczue aller ierer scheden schuldig und gepunden genczleich abzelegen und widerzekern, der sy von allem unserm/ guet, so wir indert haben, gewynen und lassen bekomen sullen, so nachst sy mugen an unser aller unser eriben und miteriben und an manikleichs/ auszug und einred ungeverleich; mit urkund des briefs, den ich vorgemelte Anna und ich benannter Jorig Luegmayr fuer uns und fur aller unser/ obgemelten miteriben unser geswistred, vettern und muemen und fur aller unser eriben dem egenantten unserem genadigen herren abbt Vlreichen zu Wilhering,/ dem convent und gotshaws daselbst und allen ieren nachkomen geben besigelten mit der edelen Jorig von Laymbach, an der zeyt lanndtrichter im Tuontall und Pawlsen Wolfflukchner, beyder anhangunden insigel, die sy an den brief gehangen haben durich unser fleissiger bett willen,/ in und allen iren eriben anschaden; darunder ich mich vorbenantte Anna, Micheln des Schefmair hawsfraw mitsambt dem selben meinen lieben/ wirt, mit des willen und wissen der hanndl beschehen ist und auch ich benantter Jorig Luegmayr fur uns und fur die obgemelten miteriben unsere/ liebe geswistred und vettern und muemen, so dan oben an benent sein, dafur wir uns an nemen und genumen haben wissentleich mit dem/ brief und fuer aller unser eriben an rechtes aydes stat verpinden mit unseren trewn, alles das war und stet ze haldten, so an dem brief begriffen/ und verschriben ist, der geben ist an freytag nach sand Gregorgen tag nach der purd kristi im vierczehen hundertisten und nawn und/ dreyssigisten jare.