In dem namen gottes. Ich Fridreich Volkrat, Ernreichs des Volkrats saligs sun, die zeit gesessen ze Attenshaim, vergich fur mich und fur/ all mein eriben und tuen chund mit dem offenn brief aller me/anichleich, die in sehent, hornt oder lesent, gegenbürtigen und kunftigen, das/ ich mit wolbedachtem muet, gesuntem leib und gueter vernu(n)ft und nach frewnt rat geben, geschaft und gemacht hab, gib, schaff und mach/ auch wissentleich in kraft des briefs durch hail hillf und trost willen meiner sel und aller meiner vorvadern und nachkomen und aller ge-/ laubigen sel dem wirdigen gotzhaws des heiligen martrer sannd Larenczen gein Gramhartsteten in das zechschrein czu einem ebigen iartag/ das guet genant cze Choglmos gelegen am walld czwischen des Rewtter und des Aygenholcz in Grämhartsteter pfarr und in Wachsenberger/ lanntgericht, da die czeit chain behawsung auff gebesen als vor her komen ist und ist freys rittermässigs aygen und dient ierleich ain phunt/ pfennig gellcz lanndes werumb zu Osterreich ob der Enns czu rechter gebondleich dienst czeit, und zway vogt huen ainem vogt, wer der dann ist/ der hernach genent und gemelt wirt. Ich hab auch das obgeschriben pfunt pfennig gellcz dem obgenantten goczhaws ze Grämhartsteten und/ den zechläwten daselbs uber geben, ingeantburt und bestätt aus meiner und aller meiner eriben nucz und geber in des goczhauss oder der zechläwt/ nucz und gewer, in solher mass und und maynung, das die zechläwt ze Grämhartsteten, wer die sind oder werdent das obgenant pfunt pfennig gellcz/ all iar ierleich von dem egemelten guet sullen in nemen in das zechschrein und sullen ainem yeden pfarrer oder vicari zu Grämhartsteten davon/ ierleich ausrichten und geben segchs schiling pfennig; der sol darumb ausrichten und begen einen ebigen iartag in der nagsten wochen vor oder nach/ sannd Michelstag unverczogenleich mit einer gesungen vigili und mit einem gesungen sel ambt und funf gesprochen messen und sol der pfarrer/ oder vicari den goczdienst allen vigili mess gesellen und den mesner von den segs schiling pfennig ausrichten und all suntag oder wann man/ sunst in der wochen geböndleich pitt umb die saligen sel, so sol man auch pitten umb aller der sel, dy aus dem nam und geslecht der Volkrat, es/ sein frwan oder man, jung oder alt, verschaiden sind; dann von den übrigen sechczigk pfennig sullen dy zechlewt chauffen umb sechczehen pfennig / prot und umb sechczehen pfennig fleisch und die geben und tailen armen läwten und sullen den obgenantten goczdienst des iartags allen mit/ vier stekcherczen belewchten, dy pey der par sullen prynnen. Ich sol auch und nach meinem abgang mein eriben albeg der elter des nams und/ geslecht der Volkrat des obgenantten guets vogt sein, und wann des nams nymer mandleich eriben warn, so sol ein yder, der des goczhaws/ vogt ist, des guets auch vogt sein, doch dem goczhaus an schaden und wer ungeverleich under den obgenantten vogt ist, ich oder mein nachkomen,/ dem sol man dy obgemelten zway vogt huen ierleich von dem obgenantten guet raichen an all ausczug; wär aber das ein vogt dem goczhaws wolt/ zu swär sein und unrechtleich vogten, so habent mein eriben oder darnach dy czechlewt und auch ander pfarrlewt zu Gramhartsteten volligen/ gevallt und guet recht mit eins pfarrer hillf willen und gunst in ein andern vogt ze nemen aus dem nam der Volkrat oder darnach ob der/ nicht (enbern) wen sy wellen; (wär) aber dacz ein pfarrer oder vicari oder dy zechlewt darinn sewmig warn und daz der obgenant goczdienst also/ nicht gänczleich ausgericht wird, alls vor geschriben ist, so habent mein eriben oder wer darnach vogt ist, auch dy pfarrle/awt volligen gevallt/ sich des obgenantten pfunt pfennig gellcz auf dem guet wol ze underbinden und alls lanng innhaben, nüczen und nyessen und den iartag und all/ ander obgemelt guettat ierleich davon ausrichten czu Grämhartsteten oder pey einer andern pfarrkirchen dapey alls lang und sovil uncz das/ man den obgenentten goczdienst ganczleich ausricht und was abgangs beschehen wär, das der auch erstatt werdt, so sol man dem goczhaus/ dann des pfunt gellcz an all irrung und widerred abtreten und in der zechlawt gwer anttwurtten an all ausczüg. Ich obgenantter Fridreich/ Volkrat pin auch des pfunt pfennig gellcz auf dem obgenantten guet fur mich und all mein eriben in obgeschribmer maynung des goczhaus/ zu Grämhartsteten und der zechlewt daselbs rechter gber und furstanndt für all rechtleich ansprach wo oder wann und wie offt des mit/ recht not beschicht, alls geberschaft solhs (geme/acht) und freys rittermessigs aigen recht ist im lannt ob der Enns; mit urchundt des briefs/ versigelt und bestätt mit meinem aigen anhangunden innsigel und zu merör sicherhait hab ich auch vleiss gebeten den wirdigen geistleichen/ herren her(n) Ruegern Ploch, pfarrer ze Grämhartsteten und mein lieb vettern Gorigen den Volkrat und Kaspar den Chressling, die zeit phleger/ ze Attenshaim, das sy all drey ire innsigl zu geczeugnuss an den brief gehangen habent, in und iren eriben an schaden; darunder ich (mich) obge-/ nantter Fridreich Volkrat und all mein eriben verpint, alles das war und stat ze halten, das an dem brief geschriben stet, der geben ist am/ Montag vor sannd Urbans tag, alls man czalt nach christi gepurdt tausent vierhundert und in dem ains und vierczigisten iare.