Ich Hanns Schuester zu Alhatstorf vergich fur mich und all mein erben und tun kund offennleich mit dem brif/ allen den er furchumbt, dacz wir mit wolbedachtem muet und guetem willen zu der czeit, do wir das mit recht wolgetun/ mochten, recht und redleich ledichleich verchauft und zu kauffen geben haben unsern gantzen zehent zu Nuspach/ in Gremensteter pharr, gelegen in Wessenberger lantgericht, Hannsen dem Mair ander wiss, Margrethen seiner/ hausfraun und irn erben, der zelehen rueret von den edel vesten Pernharten von Newndling, seinen bruedern und irn/ erben unsern lieben herren umb ain gelt, des uns wolbenuegt und des wir zu rechten tagen an all scheden gancz aus-/ gericht und beczalt sein worden. Wir haben in auch den egenanten zehent zu Nuspach mit seiner zugehorung auf-/ geben, bestet und ingeantburt mit lehenherren hannt und aller der stet, der sy daruber bedurffen, darczu mit allen/ den ern, nuczen und rechten, so darczu gehort oder davon bechomen mag, des nichts ausgenomen und mugen auch/ nu furbaser mit demselben zehent allen irn frumen wolgeschaffen, verseczen, verkauffen, schaffen machen und geben,/ wem sy wellent und damit tun und handeln, wie sy verlust irn unser und aller unser erben auch menichleichs von/ unsern wegen irrung und hindernus ungeverleich. Wir sein auch des obgenanten zehents zu Nuspach mit seiner zuge-/ horung ir recht gbern und furstant fur all ansprach, wo oder wann und wie oft in des mit dem rechten not und/ durft beschiecht, als dann solhs kaufs zehents lehens und lanndes ob der Enns recht ist. Gieng in ab(e)r mit recht/ daran icht ab, wie sich das fuegt oder von wem das wer mit dem rechten, des sy zu schaden kamen, denselben/ schaden zu sambt dem abgankg und kauf sullen und wellen wir in genczleich erstatten und widerchern und/ sullen sy das alles haben zu uns, unser erben und trewn darczu auf allem dem guet, so wir uberall yndert haben,/ ge(bing)en und lassen und mugen sy haubtguet abgankg und schaden davon pechomen, so sy nagst und pesst mugen,/ das ist alles unser gueter willen und wort an widersprechen wir sein lembtig oder tod, mit urchund des brifs/ besigelt durch unser vleissigen pet willen mit des benanten edln vesten Pernharten von Newndling unsers lehen-/ herren als des eltern an stat sein und seiner prueder anhangunden insigel, doch im und seinen bruedern und irn/ erben anschaden, und an jar lehenschaft vordrung und rechten unengolten; darunder ich mich vorgenanter Hanns/ Schuester und all mein erben verpind mit unsern trewn, alles das war und stet zuhalden, so oben an dem brif/ geschriben ist. Geben an phincztag sant Peters und sant Pauls abent der heiligen zwelifpoten nach kristi/ gepurd tausent virhundert und indem zbaiundvirtzigisten jaren.