Ich Ulrich Munichmair, burger ze Everding, mit sambt mir mein hawsfraw, veriehen fur uns, all unser erben und tun kund mit dem/ offen brief allen, den er furchumbt, das wir mit wolbedachttm muet und nach rat unser pessten frawnt czw der zeiten, do wir/ das mit recht wol getun mochtten, recht und redleich verchawfft und zekauffen geben haben dem erwirdigen geistleichem heren/ abbt Vlreichen ze Wilhering und dem canczen convent daselbs und allen iren [nachkomen] unser wisen, dy gelegen ist czwischen/ der Pirchen und der Hochrencz in Offtheringer pfarr im lanndgericht im Twnawtal und die mir zechawffen geben hat der erber/ Pauls Widmer ze Offthering und mit sambt im sein hawsfraw und davon ich gedient hab dem erwirdigen gotzhaus Wilhering/ alle jar ze rechter gewondleicher dienst zeit zehen wienner pfenig und nicht mer; wir haben in auch dy obgenantten wissen ledick-/ leich ansprach ingeanttwurt und geben zu einem rechtten chauf nach lanndez recht ob der Enns aws unser nucz und gewer in die/ iren mit aller bestatt urkund und rechtten, die wir daran gehabt haben umb ain gelt, dez wir von in gancz und gar gericht und/ gewert sein an allen schaden und zuspruch nu furbaser zebesiczen, innzehaben, nuczen und niessen, allen iren frum damit schaffen,/ mit verseczen, verchawffen und damit hanndeln, wie sew dez verlusst an alle irrung und hindernuss angever; und was wir oder/ ander yemant von unsern wegen daruber mit in und gegen allen den, die dy vorgenant wissen von in zelehen haben und/ und besiczent, kriegetten oder tetten, wie sich das fueget oder elltter brief daruber hietten und furbrachtten, dy in zu schaden/ mochtten komen wider den brief, das sol allez gancz und gar ab und tod sein und kain krafft wider den gegenwurttigen brief/ nicht haben; wir sein auch der egenanten wisen ir recht gewern und furstand fur uns und [unser erben] fur all rechtleich/ ansprach, wo oder wann in dez mit dem rechtten not und durfft geschiecht, als solichs chawfs recht ist in dem lannd ob der Enns/ angever. Gieng in aber [daran] icht ab oder daz in inndert ain krieg oder irfal darinn auferstuent an dem rechtten, wie sich das fueget/ von uns und allen unsern erben, dez sy zu schaden chemen, wie die [genant werden] die […] bey sein […]ge-/ sworn slechtleich gesprechen mocht in ains wortten slechtleich daruber […] den selben schaden allen mit sambt dem hawbt-/ gut sullen und wellen wir in genczleich ablegn und widerchern an alle widerred, und sullen sew daz allez haben dacz uns/ und unsern trewen und darczu auf aller unser hab, die wir haben, wie die genant oder wo die gelegen sind, inner oder ausser/ lanndez, besuecht und unbesuecht, nichtz ausgenomen; und sy mugen haubtguet und schaden davon wol bechomen/ anchlag, furbot und rechttn, so sy nachst mugen und in das aller pesst fueget, das ist alles unser will und wort an alle/ irrung und hindernuss, wir sein lembtig oder tod, und dez zu urchund geben wir in den offen brief fur uns und all unser/ erben versigelten mit meinem obgenantten Ulreichen dez Munichmair anhangunden insigel, und ze einer pessern sicher-/ hait und geczewgnuss hab ich gepeten den edeln und weisen Conraten den Eckher, die zeit statrichtter ze Everding,/ daz er sein insigel auch [an] den brief gehangen hat, doch im und allen seinen erben an schaden; darunder ich mich verpindt,/ allez daz war und stett zehalden, das an dem brief geschriben stet, der geben ist nach kristi gepurd vierczehenhundert und/ in dem acht und virczigissttm jare an mantag nach oculi in der vasstten.