Wir Abbt Ulreich ze Wilhering und der convent daselbs bekennen fu/er uns, all unser nachkomen und tun kund offenleich mit dem brief allen lewten,/ dy in sehent oder horen lesen, das wir mit wolbedachtem muet unverschaidenlich miteinander verliehen und verkauft haben Pettrein, Wernhartten im/ Hayhenpach genant im Rewt sun, seiner hawsfrawn und irn baiden eriben unser obgenants gu/et im Hayhenpach gelegen, daz unser vreis aigen ist/ zu ainem rechten frein kaufrecht mit allen eeren, rechten und darczu gehört ze holcz, ze veld, ze wismad, ze dorf und es von alltter herchomen ist, umb ain gelt,/ dez wir gancz und gar von in gericht und gewert sein an all schaden in solicher beschaiden, das sy und ir eriben oder wer daz gut von uns zelehen hat, uns, unserm/ gotshaws und allen unsern nachkomen davon raichen und dienn sullen alle jar jerlich zu sannd Andres tag zwelif schilling pfennig lanndez werung ob der Enns/ und nicht mer; tetten sy aber dez nicht und uns den dienst versassen darnach uber vierczehen tag, dann so sind sy uns zwen und sibenczigk pfennig ze wandl/ versassen sy uns aber den obgenantten dienst drey vierczehen tag, dann so sind sy uns an dem egenantten gut all irer gerechtichait vervallen; sy sullen auch unser/ gwerttig gehorsam holden sein mit alle dem und recht ist darauf siczn, kayn hern noch schermb fur uns nemen, noch haben, vor unser ze recht sten umb all sach,/ in unser stiffttaiding komen oder wir hietten sew darumb ze straffen; geschech aber, daz sich das obgenant gu/et verwandlet von ainem auf den andern, oder ain tod/ beschech, wie sich das ymmer fueget, dann so sullen sy uns, unsern nachkomen von yedem besunder geben sechczigk pfennig und nicht mer; wer aber, das uns, unserm gotshaus/ not beschech ainer stewr oder ainem landsfusten stewern musten, dann so sullen sy stewr dulden und leiden, alz anderer unser hindersassen tun angever; es ist auch ze mer-/ chen, ob der obgenant Peter, sein hawsfraw baider eriben ire rechten auf dem vorgenantten gu/et, seiner zugehorung wolten oder musten verkauffen oder verseczen, wie sich das/ fueget, so sullen sy uns di selben recht anpieten abczelosen; woltten wir dann nicht losen, so mugen sew darnach mit unserm gutlichem willen verkauffen, doch nur irm gleich/ und unengoltten unser gerechtichait alz sy oben an dem brief gemelt ist; wir sein auch dez benantten kaufrecht ir recht gewern, schermb und furstandt wo und/ alz offt in dez mit recht not beschiecht, alz dann solichs kaufrechtz lanndes ob der Enns recht ist; daz dy red und hanndlung statt und unverchert bleib, daruber so/ geben wir in den brief besigelten mit unsern baiden anhangunden insigln nach kristi gepurdt vierczehenhundert in dem newnundfunfczigistem jare an man-/ tag nach der heiligen dreyr kunig tag.