Wir Wilhalm abbt ze Wilhering und der ganntz convent daselbs bekennen fur uns, all unser nachkomen und tun/ kund offenleich mit dem brief allen, den er furkumbt sehent, horent oder lesent, das wir mit gutem willen und zeitigem/ ratt recht und redleich verliehen haben und verlassen auch in krafft dez briefs zu ainem rechten kaufrecht unser/ gut in der Obern Pernaw und haisst das Gellttinger lehen, das unser freis aigen ist und das weilent der erwirdig geist-/ lich herr, unser vorvoder abbt Jacob saliger vormalen verkauft hat den beschaiden lewtten Wolfgang, Margreten seiner/ hawsfrawen, allen iren baiden eriben, dy sy ycz haben oder noch hinfur gewinnen umb ain gelt, dez wir ganncz und gar von/ in gericht und gewert sein an schaden in solicher beschaiden, das sy uns, unserm gotshaws gen Wilhering jerleich davon/ dienn und geben sullen zu der rechtten dienstczeit oder darnach inner vierczehen tagen funf schilling wienner pfennig und/ nicht mer; es ist auch ze merkchen, das sy von uns entladen sullen sein allez umbgeltz nur allain wann unser gotshaws so-/ tan [irr] nott angieng, daz wir ander unser holden stewertten, so sullen sy uns zu statten komen und geben zwen und dreis-/ sigk pfennig; wann sich auch daz gut verwand(e)lt von ainem eriben auf den andern, es sei mit dem tod oder sunst, so sullen/ uns baid tail geben auf und ab fur all sach zwen und dreissigk pfennig und von uns besten; sy sullen auch besuechen unsre/ taiding, darein komen und pringen vier prot pfennig und vier pfennig fur kass und sullen auch umb all sach vor uns zu/ recht sten; geschech dez allez nicht, so hietten sy an dem gut alle ire recht verloren; wir sein auch dez vorgenantten gut/ und kaufs ir herren und gewern, wo in dez not und durfft geschiecht nach dez lannds recht, das inn daz gut leyt. Gieng/ in aber an der gwerschafft mit recht icht ab, daz sullen sy haben, daz uns und unsern trewen darczu auf dem obge-/ nantten gu/et mit aller zwgehorung; daz der hanndel statt und unverkert bleib geben wir in den brief besigeltten/ mit unsern baiden anhangunden insigln, der geben ist nach kristi gepurdt vierczehen hundert und in dem zwai und sechczi-/ gistem jare am errtag in den oster veyrtagen.