Ich Michell der Sigharttar beken fur mich und fuer all mein eriben und tu/en kunt offenleich mit dem brief/ allen lewtten, die in sehent, horent oder lessent, das ich mit wolbedachtten muet und zu derczeit, da ichs/ mit recht woll gethuen macht, recht und redleich zu rechtter widerlegung am ersten fuer gangen pin/ mit czwayn und dreissichk phunnt phennig und da engegen hat mir pracht mein hausfraw Anna, des edell/ Veichtnar thachtter fomb phunt phennig, alsso in acht unsser paider summa siben und dreissigcht phunt/ phennig; aus unsser paider hab vermach ich ir ledigkchleich czw freyer margengab und verloren guet in/ krafft des briefes fomfczechen phunnt phennig meiner hausfrawn Anna, da mag sy ob ich nicht enwar und auch/ nicht leib eriben mit einander hietten allen yrren frwmben da mit schaffen machen und gewen und da mit/ handelln und tun wie und sey damit verlust und guetczymbt, alls dan solichs gema/echcz und margengab verlorens/ guet recht ist indem lant ob der Ens. Wen die ander czway und czwainczigkch phunt phennig, die schullen gesten/ alls lancz recht ist ob der Ens ungevarleich; sunder ist zw merkchen und ob wier leib eriben mit einander/ hietten und gewungen, des uns got nicht verczeichen soll, so solls darnach eriben an eins chyncz stat ir soll/ auch nach volligen ain chwe nach der pestten und halber hausratt alls aynner frawn zuegepuert/ und ain gerichttacz pett mit aller czuegeharung; swnder ist czw merkchen und ob unsser ains in iar-/ friscz abgieng, so sollauf unsser yetwedertaill hinwider haymb gen auff sein nagst frewnt, die pesten/ drew stukchell unssers chirichgewancz; auch ist czu merkchen und ob mein hausfraw Anna vor mein/ abgieng, da got lang var sey, so ist mir da obgestympt gemacht und was sy zw mir pracht hat auch/ ledigkchleich in mein gewaltsambkaichtt verfallen und ledig waren an all ir und aller ir eriben und freunt/ einredt yrrung und hindernus und widersprechen; da mit mag ich auch handellen und tun, wie mich verlust/ und guetczymbt; ich Michell der Sigharttar hab meiner hausfrawn Anna dafuer eingesaczt fur ir mar-/ gengab und was ir rechtleich nach soll volligen all mein hab und guet, wo ich das hab, gewing oder hinder/ mein lassee, nichcz aus geczogen alles hie inne weslossen; wen das alles soll ir fuerphant sein, ich sey lembttig/ oder tod und soll das alls lang uncz inne haben, nwczen und niessen mit aller zuegehorung, alls lang/ da mit das ir ain volliges wenuegen darumb weschiecht, des sey woll genuegt wen das ist mein guetleich/ will und wart an alls gevarde; es habent auch mein eriben und frewnt recht, ob ich nicht enwar all mein/ hab und guet umb die oben genantten fwmfczechen phunnt phennig landes berung ob der Ens wider abczulassen/ all jar ja/erleichen zw unsser lieben frawntag czu liechtmessen vierczechen tag vor oder vierczechen tag hin nach und/ sunst zu kainer zeit mer ymb jar; man soll in auch der lossung guet stat tuen und nicht wider sein und des/ zw urkundt gib ich ir den offen brief zw einer geczeugnus irs gema/echcz, mitt der erberen und weissen Thoman,/ richttar zw Gramelharsteten und Petter Schuesttar, dieczeit richttar zw Sant Veicht und Hanssen des Parenreittar/ mit der aller dreier aigen auf gedruchtten pedschaftten, die sew czw geczeugnus durich meiner vleissiger gepet [willen]/ auf den brief gedrucht habent, doch in und allen irren eriben anschaden; untter der dreier manen pedschafft ich/ mich Michell Sigharttar und all mein eriben vesttikchleich verpinden mit unsseren trewn in aides weis, alls/ das war und stat czw haben, das andem brieff geschriben stet. Es sint auch der zeugen und spruch lewdt/ gebessen die erwern beiss Hanns Ratdellmullnar, Petter Schuesttar zw Sant Veicht, Hans Parenreittar, Lienhart/ Edlinger. Geben nach cristy gepurt vierczehen hwndert jare und darnach in dem newn und sechczigistten/ jare am eritag vor sant Paulls becherung.