Ich Hainreich Gewman bechen fur mich und all mein eriben und tuen kund offenleich mit dem brieff, wo der zu sechen, horen oder zw/ lesen furkumbt, alls uns die erwirdigen und geistleich herren her Vrban, abbt zu Wilhering und der gancz convent daselbs aus irem chassten/ funff und vierzigkch metzen korn und funff und vierczigkch metzen habern uns jarleich gein Lincz zu dienen umb hunderdt und funffundsechzigk/ phund phening gueter landes werung verchaufft habent inhalt aines chauffbriefs, so wir von in darumben haben, hab ich fur mich/ und all mein eriben dem obenanten abbt und convent, auch allen iren nachkomen und gotshaus durich sunder lieb und trew willen, so ich/ zu in, irem gotshaus hab widerumb gelobt und versprochen, gelob und versprich in auch wissenleich in krafft des briefs, das ich oder aber mein/ eriben dem egenanten abbt und convent, allen iren nachkomen den obenanten getraid karn und habern aines jeden jares vierczehentag vor unser/ lieben frawntag der liechtmessen oder vierzehentag hinnach so sy uns mit dem brieff ermanent und sunst im jar nicht mer umb die obenanten hund-/ erdt und funff und sechzigkch phund phening gueter landes werung an alle irrung und widerred hinwider zu chauffen geben sullen und wellen/ an mein, aller meiner eriben, auch an menikleichs von unserent wegen widersprechen, irrung, eintrag und widerred getreuleich und angevard. Wescha-/ ch aber, das ich, mein eriben oder ander iemant von unsernt wegen den obenanten herren von Wilhering, iren nachkomen sollichen widerkauff/ zu den egemelten zeitten aines jeden jares umb die egenanten suma gelts nicht widerkauffs stat tuen wollten, damit saumig wurden auch inn/ wider iren willen nach irem ermanen verczugen, was sy des dan darnach schaden namen, es war mit nachraisen, zerung oder pottenlon kain schaden/ ausgenomen in oder iren gewissen scheinpoten slechten warten ungeswarn ganczleich darumb zu gelauben, den selben schaden allen geloben wir in/ gancz und gar abzutragen, auszurichten und widerzukeren an all ir mue und schaden; und sy sullen und mugen auch dan das alles haben und/ wekomen zu uns, unsern eriben und trewen auch darzue auff allem unserm anligundem erib und varundem guet, nichts ausgenomen, des sullen und/ mugen sew sich alsdan woll sovill mit recht underbinden inhaben, nuczen und niessen; dapey sew dan ain jeder landes haubtman halten und weschi-/ ermen sullen unczt sy aller irrer abgang und schaden gancz davon einkomen und wenuegig sein, das alles ist ganczleich unser guetleicher will; und sullen/ noch enbellen auch das in kain wegen widersprechen alles getreuleich und ungevarleich und das den oftbenanten herren von Wilhering, iren nachkomen/ die handlung und red von uns, unsern eriben stat und unverkert weleib, des geben wir in den brieff besigelt mit meines obenanten Hainreichen Gewman/ anhangunden in sigel und zu merrer sicherhait und gueter gezeugnus hab ich mit vleys gepetten den edeln vesten mein gueten frewnt Andre Viechtenstai-/ ner, das er sein in sigl auch an den brieff gehangen hat, im und sein eriben anschaden. Geben nach der gepurdt christi tawssent vierhunderdt und in vier-/ und sibenczigisten jar an mittichen nagst vor letare ze mittvasten.