Ich Margret, weylent Andreen Huebmair zw Alkoven und Kathrein seiner hawsfrawn paider saligen gedachnuss tochter und Thoman/ Kimperl elichew hawsfraw bekenn fur mich und all mein eriben und thuen kund offenlich mit dem brieff allen, den er zw sehen,/ horen oder lesent furkumbt; als von aller zwespruch und vordrung, so ich von mueterlichs eribtails wegen geseczt und gehabt hab auff dy/ pawmansrechten des Angerhoffs mit seiner zuegehorung, gelegen aufm Edransperg in Schonheringer pfarr und im landgericht Tuennawtal, der/ des erwirdingen goczhawss Wilhering freis aigen ist, umb dy selbm zuespruch und vordrung meines muetterlichen eribtails oben ver-/ nomen, hat sich der erwirdig und geistlich herr, herr Thoman, abbt zw Wilhering nach rat meines genadigen herren herrn Michelen/ von Trawn auch ander frumber lewt und besunder mit willen und wissen meines benantten hauswirtts Thoman Kimperl liebleich und frewnd-/ lich mit mir verricht und geaint auff ein gancz stacz ennde umb ain sumb pfenning, so mir zegeben gesprochen worden ist, daran mich wolbenuegt/ hat, auch mein eriben hinfur alzeyt benuegen sol und der selben summa ich gancz bezalt und ausgericht pin zw rechter zeit an allen/ schaden; darauf verzeich ich mich obgemelte Margret und all mein eriben des egenantten Angerhoffs mit aller seiner zuegehorung wissent-/ lich in krafft des brieffs der mainung, das ich, mein eriben noch ander yemancz von unnseren wegen zw dem egenantten herren von Wilhering,/ dem convent do selbs, allen irren nachkomen noch auch zw allen den, so den Angerhoff inhaben und besiczen nymermer chain zue-/ spruch, eribschafft, gerechtikait noch vordrung darauf noch darnach nit mer haben noch gewingen sullen und wellen noch en mugen, weder/ mit recht, noch an recht auch sunst in gar chainerlai weis angevar; wurd aber uber solh bricht und verzeichung von mir mein eriben oder/ vom wem das von unnseren wegen beschach icht gehandelt oder gethan, wie sich das fuegte, als dann hab wir an aller stat unrecht und verloren und/ die erwirdigen herren von Wilhering oder wer den Angerhoff inhat und besiczt am ersten fuerkomen alle irre recht gegen uns erlangt und be-/ habt, wo der gegenwurtig brieff fuerkumbt alles trewlich und ungeverlich; mit urchund des brieffs besigelt und wolbestat durch meiner/ fleissigen pette willen mit meines egenantten genadigen herren herrn Micheln von Trawn anhangunden in sigl, doch im und sein eriben/ an schaden; darunder ich mich obgemelte Margreth fuer mich und all mein eriben vestikleich verpindt mit mein trewn aides weis, inhalt des/ brieffs war und stat zehalten, der geben ist an suntag vor goczleichnam tag nach christi gepurdt vierzehenhundert und im zway/ und achczigisten jaren.