Ich Lienhart Jungwiert auffem Zaynnach bey Schonhering gesessen, ich Kathrey, sein hawsfraw, bekennen fuer uns und all unser eriben und thuen kundt/ offenleich mit dem brieff allen, den er zw sehen, [horen] oder lesen furkumbt, gegnburttigen und kunfftigen, das wir mit guetem willen gar wolbe-/ dachtleich und zw der zeit, do wir es [an menigkleich] widersprechen rechtleich wolgethuen machten, recht und redleich gestifft, gewidmet und/ zwgeaigent haben, stifften und [zwaigen] auch wissentlich in krafft des brieffs dem erwirdigen geistleichen, unserem genadigen herren, herrn Thoman,/ abbt zw Wilhering, dem convent und allen ieren nachkomen unser lieben frawn gotshaws daselbs zw Wilhering alle jar jarleich und ewigkleich/ czwen und dreyssigk phennig lanndes werung ob der Enns auff [unserm] halben guet genant im Zaynnach, gelegen in Schonheringer pharr und im landt-/ gricht Tuenawtal, das unser freys aigen ist gewesen in solher beschaydenhait, das wir, unser eriben, wer das halbguet hin fuer in haben und/ besitzen wirdet, alle jar jarleich und ewigkleich dye egemelten czwen und dreyssigk phennig zw rechter dienstzeit dem egenanten gotshaws Wil-/ hering raichen und dyenn sullen an alles […] verziechen; darfuer und darumb sullen uns, unseren vorvodern und nachkomen dye obge-/ nanten herren von Wilhering, abbt, convent und all ir nachkomen auch jarleich und ewigkleich zw hayl unsern selen und zw lob dem al-/ machtigen got […] ierer andacht haben und nach gwonhayt irs ordens umb uns, als umb ander stiffter irs gots-/ haws pitten und [unser gedenchen]. [Beschach] aber, das wir, unser eriben und nachkomen dy czwen und dreyssigk phennig nit jarleich zw/ rechter dienstzeyt ausrichtteten und geben, alsdann haben sew uns darumb ze pfentten, wie ander des gotshaws hindersassen und so wir dy/ czwen und dreyssigk phennig jarleich ausrichten, alsdann haben wir aines yesleichen jars da mit gestewrt und gedient. Wir sullen und wellen/ auch ir stiffttayding besuechen und umb all sach von in zw recht sten, chainen anderen herren noch schermb fuer sew haben noch nehmen, so/ hietten sy uns [darumb zestraffen damit] globen wir in ir getrew gehorsam holden und hindersassen ze sein alles trewleich und ungeverleich;/ und geben des zw urkund dem benanten unserem genadigen herren, herrn Thoman, abbt, dem convent und gotshaws zw Wilhering und/ allen ieren nachkomen den brieff besigelt und wolbestat mit des edlenn vesten Andreen Lufftenegkcher, dye zeit lanndtrichter im Tuenawtal/ anhangunden in sigel, den wir durich unsern pettbrieff vleissigkleich darumb gepeten haben, doch im, sein eriben und insigel an schaden;/ darunder ich mich egemelter Lienhart Jungwiert und ich Kathrey, sein hawsfraw fur uns und all unser eriben und nachkomen unverschay-/ denleich verpindten mit unsern trewn aides weis, inhalt des brieffs war und sta/et zehalten, der geben ist an freytag vor reminiscere/ inder vasten nach christi gepuerdt viertzehen hundert und drew und achtzigisten jaren.