Ich Mertt Pirichinger zu Radmansstarff wekenn fur mich und all mein eriben offenlich/ mitt dem brieff alln, den er zu horn oder lessn fur kumbt, das ich mitt woll wedachttn muet und/ guetten willn zu der zeytt, do ich das mit recht woll woll gethuen mocht, recht redlich zu kauffn/ gebn hab dem weschaiden Carsspar Tisschler sun zu Newsserlyng und alln seinen eribn den zechntt zum/ Pischollff, der da lechn isst von dem edln und vesstn Walltthassarn von Newndling zu Rattenegk/ und hab ym den auff gebn mitt herrn hantt und aller stett, der sy dar uber weduerffen umb ain/ gelltt, des mich woll wenuegt, des ich zu rechtter zeyt und tegen von imb enttricht und wezallt pin/ an allen schaden. Er mag auch mitt dem wenanttn zechnt woll alln sein frumb schaffn, mitt verkauffn,/ versezn machen und schaffen, wem er will an mein und meiner eribn auch menigkleichs von mein/ wegn ierung und hyndernuss trewlich und ungeferlich; ich obgenantter Mertt Pirichinger sez mich/ des kauffs sein rechtter geber und furstantt zu sein an aller stat, wo ymb des mitt dem rechtten/ natt und duerfft weschiecht, alls solichs kauffs und geberschafft zu Osterreich und ob der Enns/ recht ist. Gieng ym aber an dem kauff und geberschafft icht ab ym oder sein erib, des er schaden nemb,/ wie der schad genant wurd, den selbn schadn zu sambt dem kauff sullen wier ymb ablegen/ und wider kern an all ier mue und ierung und soll das haben zu mir und meinen eribn und auff/ allem meinen guett, wo wier das haben, nichtz aus genumben noch gesundertt pis so lang er sollichs schadens/ und geberschafft wenuegig wiert; das ist alls mein will und wartt, wier sein lembttig oder tad; des zu ainem/ warn urkundt der obgeschriben sachen gib ich obgenanter Mertt Pirichinger dem vorwenanttn Casspen/ Tysschler und alln seinen eriben den brieff wesidelt und westet mit des edln und vesstn Wallthassarn/ von Newndling anhangundn insigell, den ich mit fleis darumb gebetn hab, doch ym und sein eribn/ und lechnschafft unvergrifflich und an schaden. Der brieff ist gebn nach krist gebuerd taussent vierhundert/ und drey und achzigistm jar an sand Lucas tag des heylign ewangelisstn.