Ich Sigmundt Kueperger bekenn fur mich, mein hausfrawen Margrethn unnd fur all unnser paider erben unnd [tun kund][auch] offennlich mit dem brief allen, den er furkumpt, die in sehent,/ horent oder lesent, das ich mit wolbedachtem muet und gutem willen zu der zeit, do ich das rechtlich wol gethuen hab mugen, recht unnd redlich verkauft unnd zekauffen geben hab dem erbern/ Steffan Koglein, Anna seiner hausfrawen unnd iren paiden erben unnser hausraumb und pawmansrechten, so wir gehabt haben auf der huebm zu Weging mit irer zugehorung, ge-/ legen in Atnsheimer pfarr und Wachsenberger lanndtgericht, die des erwirdigen gotzhaws Wilhering freis aigen ist; also antwurt ich die hausraumb und pawmansrechten auf auf der ege-/ nantten hueben zu Weging mit irer zuegehorung aus mein, meiner hausfrawen und unnser paider erben nutz und gewer in ir und irer paider erben nutz und gewer mit allen/ eren, rechten, nutzen unnd dinsten [als wirs] und mein vorvodern ingehabt und herpracht haben und von alter herkomen ist umb ain gelt, daran mich wol benugt hat und des ich von in ganntz/ und gar ausgericht und betzalt pin zu rechter zeit an allen schaden, dadurch so mag nu der egenannt Steffan Koglein, sein hausfraw Anna und ir paider erben mit der hausraumb unnd/ pawmansrechten auf der vorbemelten huebm zu Weging zehaws, zefeld, zeholtz mit aller zuegehorung, nichts auszgenomen, wol allen iren nutz und frumen hanndeln und betrachten/ innhaben, nutzen und niessen, versetzen, verkauffen, schaffen machen und thuen, wie sew verlust und gutzymbt an mein, meiner hawsfrawen, aller unnserr erben und manigklichs/ von unnsern wegen einred, irrung und hindernus. Ich obgenantter Sigmundt Kueperger und mein erben sein auch darumb ir recht gweern und furtstant fur all rechtlich an-/ sprach, wo, wann und als oft in des notturft beschicht mit dem rechten, also kaufs und gwerschaft des gotzhaws Wilhering und lanndes ob der Enns recht ist angevar. Gienng/ in aber an dem kauf und gwerschaft mit recht icht ab, wie sich das fuget, des sew schaden namen, sol und wil ich in ausrichten und widerkern an alle widerred. Sie schullen auch das/ alles haben und bekomen zu mir, mein erben und trewn unnd dartzu auf allem unnserm gut, wo wir das unverschaidenlich inndert haben, wie sie nagst mugen und in am pessten/ gefelt, alles trewlich unnd ungeverlich; mit urkund des briefs verferttigt und bestat durch meiner fleissigen pette willen mit des erwirdigen gaistlichen meines genadigenn/ herren, herren Thoman apt zu Wilhering [sein] anhainigenden insigel, doch im und sein nachkomen an schaden, auch dem erwirdigen gotzhaws Wilhering an seiner/ freien stift dinst und vordrung unvergriffenlich und un[engoltn]. Daruntter ich mich obgenanter Sigmundt Kueperger fur mich, mein hausfrawen Margrethn und fur unnser/ paider erben verpindt mit mein trewn aides weis, innhalt des briefs war und stat zehalten, der geben ist an suntag nach sand Apolonia tag der hailigen junckfrawn/ nach cristi gepurt viertzehenhundert unnd in funfundachtzigisten jarn.