Ich Georg Dyem, pfarrer des erwirdigen gotshaws Sannd Laurenczen zw Gramansteten, ich Sigmund Durstperger, ich Hanns Kayser,/ Schuester, bayd zechmaister und wier die gancz pfarrmenig daselbs bekennen aintrechtiklich und gar bedachtlich fur unns und fur all unser eriben und nach-/ komen, yecz lebentig und hernach kunftig, offenlich mit dem brief allen, den er furkumbt: Als Fridreich der Perngrueber und Anna, sein hausfraw, bayde salige,/ vor zeiten und nach innhalt ains stifftt briefs ain halbs pfundt pfenning freys aygen auf dem hof zw Mulperg zw ainem ewigen jartag indas zech-/ schrein Sand Laurenczen geschafft und gestifft heten, nun haben wier den selben hof zw Mulperg und mit sanbt das halb pfundt pfenning dienst freys aigen,/ so man jarlich von des benanten jartag wegen davon gedient hat und mit aller seiner zwegehorung von groser notturft und namlichen von des paws wegen/ an Sannd Laurenczen gotshaws getan verkawffen muessen, doch also und in solher maynung, das der jartag und gotsdienst, so der benant Perngrueber und sein/ hausfraw salige geschafft und gestifft haben ewiklich an abgang zw volbringen nit underwegen beliben, sunder fur und fur jarlich volbracht und gehalten/ werde, auch sovil und zw der zeit, wie es dann ir voriger stifft brief inne halt; darumb haben wir obgenant pfarrer, zechlewt und die ganncz pfarr-/ menig zw Gramansteten das benant halb pfundt pfenning freys aygen dienst von dem hof zw Mulperg genomen und mit sambt den selben hof mit aller/ seiner zwegehorung frey und ledig verkawfft nach innhalt ains kawf briefs und haben dasselb halb pfundt pfenning anderswo gestifft, geordent und/ gelegt auf das guet zw Protweg in Gramansteter pfarr gelegen, das auch ain halb pfundt pfenning jarleich in das zechschrein Sand Laurenczen/ raicht und dient und auch freys aigen ist, dasselb yecz benant halb pfund pfenning freys aigen schaffen und machen wir in kraft des gegenburtigen/ briefs auf dem benanten guet zw protweg zw des benanten Perngruber und seiner hawsfrawn saligen jartag, also das derselb jartag nun furan/ auch ewiklich an abgang jarlichen gehalten und volbracht sol werden nach innhalt und awsweisung des alten stifft briefs des nagsten mantag/ nach dem suntag der heyligen drivaltikait des nachts mit ainer gesungen vigilig, des margens mit ainem gesungen sele ampt und mit dreyn/ gesprochen messen; von den dreyn schilling pfenning sol ain yeder pfarrer oder vicary den gesellen und mesner awsrichten und bezalen, umb die ubring/ dreyssig pfenning sol ain yeder zechmaister den benanten gotsdienst beleichten und die ubermass sol bey dem gotshaws beleiben; es sol auch ain yeder/ pfarrer oder vicary alle suntag auf der kchanczl umb des Perngrueber und seiner hausfrawn auch umb des Wernharts Mulperger und umb all/ ir vorvodern sele pitten, alles trewlich und ungeverlich, und das auch solher gotsdienst und jartag in obverschribner mass ewiklich an abgang jarlichen/ awsgerichtt und volbracht werde, des geben wir obgenant pfarrer, zechlewt und die gemainklich die ganncz pfarrmenig zw Gramansteten den ge-/ genburtigen brief besiglt und bestatt mit des edlen und vessten Sigmunden Steger, die zeit pfleger zw Wachsnberg aigen anhangunden in sigl, den/ wir all aintrechttiklich mit vleiss darumb gebeten haben, doch im und allen seinen eriben und insigl an schaden. Zw merer gezewgnuss und pesser sicher-/ hait haben wir auch obgenant zechlewt und die ganncz pfarrmenig mit vleiss gebeten den erwirdigen ingot und geistlichen herrn Georgen Dyem,/ pfarrer zw Gramansteten, das er sein insigl auch an den brief gehangen hat, doch im und allen seinen nachkomen und insigl auch an schaden./ Darunder wir unns obgenant all miteinander aintrechtiklich fur unns und fur all unnser eriben und nachkomen verpinden in aydes gweis, alles/ das war und state zw halten, was oben an dem brief geschriben stet, der geben ist als man zalt hat nach der geburdt christi vierzehenhundert/ und darnach in dem sybenundachczigisten jare an mantag nach sannd Urbans tag.