Ich maister Lenncz Hamersmid undter Gramanstetten, mit sambt mir mein hausfraw wekennen fur uns und fur all/ unser erbm und tun chund offenlich mit dem brieff allen lewtten, die in sehant, hornt oder lesent, do wir das aller ma-/ nigklich mit recht wol getun mochten, recht und redlich geschafft und gebm habm, schaffen und gebm auch wissen-/ lich mit chrafft des briefs zw ainem ebigan iartag unser zehant, als sew mit namen hernach an dem brieff geschribm/ stendt: (item) von erst ganczen zehant auff dem guet an der widem pey dem Eittenperig; (item) auff dem guet zw Parigfrid/ zbay tail zehant; (item) auff dem guet zw Winthag zbay taill zehant; (item) auff der hofstat genant auff dem Schaln-/ bergkch auch zbai tail zehant mit aller irer zuegehorung, gelegan in Gramanstettar pfarr und in Wassenbergar/ herschafft und dy dann unser freis aigen sind; die schaffen wir und gebm auch die in das zechschrein zw Gramanstetten/ Sand Larenczen chirichan den zechleytten, wer dye seindt und davon sullen dan die zechleytt gebm und raichen alle yar/ jarlich ainem yedem pfarrar oder vicary zw Sand Larenczen chirichan zehan schiling pfennig gabiger munss,/ das die ausrichtan uns ainen ewigan iartag zw hilff und zw trost uns und unseren nachkomen und vorvaderen und allen/ gelaubigen selen des nachsten tag nach Sand Larenczen tag des nachts mit ainer gesungen vigily und des morgens mit/ ainem gesungen selambt und mit ainem gesungen ambt von unser liebem frawn irer schiedung und mit sechs gesprochen/ messen, das der mess also acht sind gesungen und gelesen; war aber das Sand Larenczen tag geviel an den sambstag, so sol dan/ der iartag pegangen werden an dem nachsten mantag darnach und nicht weitter noch lenger verczogen in aller der/ mass, als obem geschriben stet; und dann so sol der pfarrar oder vicary von dem benanten goczdinst von den vigily und/ messen dem gesellen und mesnar von den zehan schiling ausrichten iren tail und auch all suntag oder wan man/ sunst in der wochan gebondlich pitt umb dy seling sell, so sol man auch pitten umb maister Lenncz Hamersmid undter/ Gramanstetten und mein hausfrawn und umb all unserer varvaderen und nachkomen selen mit ainem Ave Maria/ und dann vor der uberteurung der zehan schiling pfennig sullen dye zechleyt den goczdinst da mit weleichtan und/ dy cherczen zw der par auff stekchan nach eren und pey dem goczdinst prynnen lassen von dem anfankch hunczt an das/ endt. War aber das der goczdinst verczogen wurdt und nicht ausgericht zw der obgenanten zeitt so der zechmaister,/ wer der nun zw den zeitten yst, dy yeczgemelten zehan schiling pfennig inne habm und da von peleichten auff/ den allteren und als lang inne habm an stat des goczhaws hunczt das der obgenant goczdinst volpracht wirdt zw/ obgenanten zeit. Ich obgemelter maister Lenncz Hamersmid will auch dy obgemelten zehant inne habm, unvertandlich/ nuczen und niessen mein lebtag und den goczdinst auch pey meinem lembtigen leib nach meinem vermugen zw der/ obgenanten zeitt ausrichten und weczallen, wie mir dan das am pessten fuegund ist, und dan nach meinem tod und/ abgangk so sullen dy obem bestimbten zehant zuesten und gevallen dem goczhaws an alle yrrung und widerred in aller/ mass und form als es obm an dem brieff geschribm stet, alles treulich und ungevarlich; und das dew red und dy/ handlung statt, war und unczebrochan peleib, darumb gebm wir, ich obgemelter maister Lenncz Hamersmid und all/ unser erbm und nachkomen dem bestimbten goczhaws Sand Larenczen chirichen und den zechleitten da selbs den offenn/ brieff wesigelt und wolbestatt mit des edlen vessten Walthasar des Newndlingar zw Rottenekk und mit des erwirding/ gaistlichen hern, herrn Ioring Dyem, dy zeit pfarrar zw Gramanstetten mit iren aigen anhangunden in sigel, dew/ sy durch unser vleissiger gepet willen zw zeugnuss der stifft an den brieff gehangen habm, doch in und allen iren erbm,/ nachkomen und in sigl an schaden. Darundter ich mich maister Lenncz Hamersmid, mein hausfraw, all unser erbm und/ nachkomen mit unseren treuen in aides weis verpinten, alles das war und statt zw halten, so obm an dem brieff gesch-/ riben stet, der gebm ist nach christi gepurdt vierczehan hundert iar und darnach in dem newn und achczigkisten/ jaren an mantag in den pfingstveirtagen.