Ich Katherina, weilend Lienhart Jungwirt am Zaynnach in Schonheringer pharr seling gelassen wittib, bekenn/ fur mich, all mein eriben und frenndt offenlich mit dem brief, wo der zusehen, horen oder lesen furkumbt, das ich gedacht und/ angesehen hab dicz zergenngklich leben und furbetracht das ewig und wir nichtz gewissers haben, dann den tod und nichtz/ ungewissers dann die zeit, weil und stund des tods; dardurch ich aus zeitlichem wolverdachtem muet und guttem willen/ zu der zeit, do ich das mit gesunttem leib und an all maniclich widersprechen wolgethun mocht, recht redlich gemacht/ und geben hab, mach und gib auch wissentlich mit disem brief den erwirdigen ingot und geistlichen vattern und herrn,/ herrn Thoman, abbt zu Wilhering und gannczen conventt daselbs und allen iren nachkomen vierczehen phund/ phening lanndeswerunng ob der Ens, die zuhaben geweist, zaygt und verschriben auf meinem drittail, so ich auf halbem guet am Zaynnach, seiner zugehorungn in Schonheringer pharr gelegen von meins manns swester Anna Pintterin/ am Zaynnach seling eelich tachter Margreten Pintterin von Lynncz und Wolfgangen, irem sune abgelost und kauft habe,/ darauf ich eemalen zehen phening ewiger gult zu dem egemelten goczhaws gein Wilhering auch geben habe, also be-/ schach [so]lich, wann ich obenente Katherina mit tode verganngen bin, danne sullen die mergedachten vatter und herren,/ abbt und conventt zu Wilhering den obestimbten meinen kaufften drittail auf dem halbm guet am Zaynnach seiner zu-/ gehorungn solanng in nuts und gewer besiczen, innhaben umb zynns, verlassen, nuczen, niessen und damit hanndeln,/ thun und lassen, wie sew verlust, alslanng und vil unczt mein nachst eriben von in ablosen umb vierczehen phund phenig/ und losung bescheen jerlich zu den liechtmessen vierczehen tag vor oder nach; wenn dann von in gelost ist und sie der/ vierczehen phund phening gancz an abslag bezalt sein, so mugen sie allen iren frumen damit hanndeln, thun und lassen, als/ mit ander irem aigen guet wie sie wellent am all meiner eriben und maniclich von iren wegen unvergriffenlich an irer/ ewigen gult der zehan phening geltz sullen furan ierlich und ewiclich von dem obestimbten drittail auf halbem guet/ im Zaynnach, seiner zugehorungen dem mergedachten gotzhaws zu Wilhering verdiennt und von meinen eriben mit brieflicher/ urkund darumben verg[…] und versorgt werden und so solh ablosung umb die vierczehen phund phennig auch ain ver-/ schreibung umb die zehen phennig gelt ewiger gult tan und verferttigt darczue den mergedachten vattern und/ herrn ze Wilhering ain […] zu irem gotzhaws geben ist, danne sullen abbt und convent disen gemachtzbrief meinen eriben/ zu iren hanten auch heraus antbortten und furbaser mein und meiner vorvordern und aller gelaubigen selen ewig und/ jerlich in tod andacht und gepett haben treulich angever; ich obenante Katherina secz mich und fur all mein eriben und/ freundt den vorbemelten erwirdigen vatter und herren, herrn abbt und convente und aller irer nachkomen umb obver-/ schrieben gemacht zu rechtem gewer und furstant fur all rechtlich krieg und ansprach, wo, wann und wie oft in des zurecht/ ir noddurfft beschiecht, alsdann solchs gemachtz und goczgab lanndes in Osterreich ob der Ens recht ist. Gieng in aber/ daran icht ab […] ansprach darinne auferstunde, wie sich das von unsern wegen mit dem/ […] den selben abgang/ […] obverschriben gemacht und gewerschaft […]/ […] und richtig machen; sy sullen und mugens auch haben, suechen und [bekomen] ze mir, allen meinen eriben und/ [freundt, darczue] unverschaidenlich auf und von aller unser hab, erib und guet, anligund und varund, clain und gross, so wir/ uberall inner oder ausser lanndes haben, gewynnen oder lassen, darinne auf wasser oder lannde nyndert noch nichtz ausge-/ nomen […] mit geistlichen oder weltlichen rechten ze underwinden, eincziehen, solanng innhaben, nuczen, niessen, hanndeln/ thun und lassen nach iren notturften, unczt sy gannts an allen abgang und schaden […] auch an abslag davon gar hab-/ haft entricht und bezallt sein, ist unser guetlich will und an kain […] wider[…] zu warem und statenn/ urkunde dicz offn gemachtsbriefs besigelten mit des edlen vessten Cristoff [Pollinger,] diezeit lanndrichter im Tainautal/ und des erbern weysen Hanns Stockmaister, an der zeit richter zu Otenshaim baider aigen anhangunden insigeln, die ich/ baid mit meinen petbriefen, in gegeben vleissig darumben gepeten habe, in baiden, iren eriben und insigeln anschaden./ Darunder ich mich und fur all mein eriben und freundt mit meinen trewen aides weys verpinde, stat zuhallten, volfuren,/ nach zugen und ingedenk zusein, innhallt des briefs. Zeugen gepets umb insigeln und verferttigung der petbrief/ sind gewesen: Sigmund Gramanstetter, leitgeb zu Wilhering, Mertt New[…] im Obern Mulpach, Steffan Angrer/ daselbs und ander leuttmer. Geben an eritag vor dem heyling phingstag nach crist unsers lieben herren geburde/ vierczehenhundert und zwayundnewnczigisten jaren.